Əmək və əhalinin sosial müdafiəsi naziri Səlim Müslümov hazırda 1100 nəfərdən çox şəxsə sosial xidmət müəssisələrində stasionar şəraitdə, 11,2 min nəfər tənha ahıl və əlil şəxsə evlərində səyyar formada sosial xidmətlər göstərildiyini bildirib.
Qeyd edək ki, ölkəmizdə sosial qayğıya ehtiyacı olan xeyli sayda insan var. Məhz belə bir təşəbbüsün görülməsi ictimaiyyətdə təqdirəlayiq addım olaraq qiymətləndirilir. Maraqlıdır, köməyə ehtiyacı olan vətəndaşlar necə aşkarlanır və proses necə yerinə yetirilir?
Hüquq müdafiəçisi Novella Cəfəroğlu "Şərq”ə açıqlamasında bildirib ki, belə bir proyektin həyata keçirilməsi üçün müəyyən çərçivələr olmalıdır. Onun sözlərinə görə, sosial yardımın həyata keçirilməsi üçün aztəminatlı ailələr, xəstələr, ahıl insanlar və kimsəsizlər uçotdan keçməlidir:
"Əvvəlcə araşdırılmalıdır ki, Azərbaycanda nə qədər kimsəsiz və köməyə ehtiyacı olan insanlar var. Dövlət bu cür tədbirləri mütəmadi olaraq etməlidir. Bu olduqca alqışlanası bir təşəbbüsdür. Lakin bu layihə həmişəlik deyil. 4 və yaxud da 6 aylıq bir layihədir. Düşünürəm ki, belə tədbirlərin görülməsi üçün bir fond açılmalıdır və bu fonda biznesmenlər, nazirliklər xırda miqdarda da olsa pul köçürmələri etməlidir. Həmin maddi vəsaitlə də bu cür işlər yerinə yetirilə bilər. Qeyd edim ki, bu proseslə ancaq başı çıxan adamlar məşğul olmalıdırlar. Həmin şəxslər də sosial işçilər adlanır. Çox istərdim ki, belə layihələrin davamı olsun”.
Yeganə Bayramova
