İngiltərənin məşhur "The Guardian" nəşri qeyri-adi macəra yaşamaq istəyənlər üçün Avropanın 10 ən yaxşı məntəqəsinin siyahısını dərc edib. Siyahıda Qubanın dəniz səviyyəsindən 2300 metr yüksəklikdə yerləşən Xınalıq kəndinin də adı var.
Xınalıq haqqında yazılan məlumatda Azərbaycanın ən yüksək kəndinin Qafqaz dağlarının zirvəsində yerləşdiyi, əhalisinin heyvandarlıqla məşğul olduğu qeyd olunub. Məqalədə sıldırım qayalar arasından, dərin dərələrdən keçən Xınalıq yolunun turistlərə ekstrim yaşatdığı bildirilir. "The Guardian" yazır ki, Qubadan Xınalığa 18 funt-sterlinq xərcləməklə getmək olar. Qonaqpərvər kənd sakinlərinin evində gecələmək və ləziz yeməklərdən dadmaq üçün də bir o qədər xərc tələb olunur.
Sözügedən nəşrdə Xınalıq kəndinin turistlər üçün əlverişli yer olduğunun qeyd edilməsi ölkəmizin turizm sektorunun inkişafından xəbər verir. Həm iqtisadi, həm də Azərbaycanın tanınması baxımından turizmin daha da inkişaf etdirilməsi əsas hədəflərdən biridir.
Turizm üzrə ekspert Elxan Vəliyev də "Şərq”ə açıqlamasında "The Guardian" nəşrində Xınalıq kəndi ilə bağlı məlumatın dərc edilməsinin sevindirici hal olduğunu deyib. Ekspert bildirib ki, ölkəmizdə turizmin inkişafı üçün otellər, turizm obyektləri təbliğat xarakterli işlər görsələr, daha yaxşı olar:
"Təəssüf ki, ölkəmizdəki turizm obyektlərinin reklam çarxları məhduddur. Düzdür, son zamanlar bu sahədə aktivlik müşahidə olunur. Azərbaycanla bağlı videoçarxlar hazırlanmalıdır. Xarici vətəndaşlar bilməlidir ki, ölkəmizdə nələr var. Məsələn, Azərbaycanın gəzib-görməli yerləri ilə bağlı "yutub” kanalında videolar yerləşdirmək olar. Yəni ölkəmiz haqqında məlumatlar müxtəlif sosial şəbəkələrdə yerləşdirilməlidir. Ümumiyyətlə, hər bir turizm obyekti dövlətin hansısa tədbir görməsini gözləməli deyil.
Təbii ki, Xınalıq kəndi ilə yanaşı Zaqatala, Balakən, Qəbələ kimi görməli yerlərimiz də var. Xınalıqla bağlı məlumatın nəşr edilməsində dövlətimizin də dəstəyi olub. Lakin bu gün adımız nəşrdə yazılsa da, sabah yazılmaya bilər. Ona görə də mütəmadi addımlar atılmalıdır.
Turizm şirkətləri və otellər düzgün bələdçi xidmətimizi, rayonlarımızda olan turizm məntəqələrini əks etdirən məlumatları dünya ölkələrinə təqdim etməlidirlər. Bu yalnız dövlətin deyil, turizm obyektlərinin, otellərin də işidir”.
Ekspert bildirib ki, turistlər getmək istədikləri ölkənin şəraiti, otelləri, gəzməli-görməli yerləri, tarixi abidələri haqqında məlumatlı olduqda, bu, onlar üçün daha maraqlı olur:
"Əlavə olaraq kampaniyalar da keçirilə bilər. Mövsümə görə münasib festivallar olur. Turizm şirkətlərimiz də bu festivallara dəstək olsa, daha böyük işlər görülə bilər. Məsələn, bu yaxınlarda "Xurma” və "Nar” festivalları olacaq. Bu festivallara qatılmaqla otelləri gözəl şəkildə doldurmaq olar. Amma bunu yalnız dövlət etməli deyil. Turizm şirkətləri də bu işdə maraqlı olmalıdırlar. Qarşılıqlı şəkildə planlaşdırma edib müxtəlif işlər görülə bilər. Belə olduqa ölkənin turizmi ilə bağlı vəziyyət daha da yaxşılığa doğru gedəcək”.
Yeganə Bayramova
