"Bu gün müşahidə olunan tozlu hava ilə insanın təmasının minimuma endirilməsi üçün xüsusi tədbirlər görülməsi vacibdir”.
Bunu "Sherg.az"-a bu gün gecə və sabah səhər saatlarında Türkmənistandan Azərbaycana hava vasitəsilə gələcək toz -dumanından qorunma usualları barədə danışarkən tibb elmləri doktoru, professor Adil Qeybulla deyib.
Həkim bildirib ki, bu hava uzun müddət davam etməsə də, əhalinin ehtiyatlı davranması vacibdir:
"Belə havada maskalardan istifadə etmək gərəkir. Bu dövrdə pəncərələri mümkün qədər bağlı saxlamaq lazımdır. Toz duman çökənə qədər və ya külək həmin havanı başqa ərazilərə daşıyana qədər insanların həmin havadan qorunması lazımdır. Bakı küləkli şəhər olduğundan bu cür toz-dumanın qalma şansı çox azdır. Amma Azərbaycan ərazisindən havanın çıxması üçün müəyyən vaxt lazımdır. O müddət ərzində insanların hava ilə ciddi təması az olmalıdır.
Çünki toz hissəciklərinin tənəffüs yollarına düşməsi bir sıra xəstəliklərə səbəb ola bilər. Maskalardan istifadə etmək, həmin vaxtda bayırda çox qalmamaq evdə olanda mümkün qədər qapıları pəncərələri bağlı saxlamaq tozlu havadan qorunmanı təmin edə bilər”.
Məlumat üçün bildirək ki, Bakıda və Abşeron yarımadasında müşahidə olunan toz dumanı Türkmənistan ərazisindən gəlib.
Ekologiya və Təbii Sərvətlər Nazirliyindən Lent.az-a verilən məlumata görə, Nazirliyin Ətraf Mühit üzrə Milli Monitorinq Departamentinin mütəxəssislərinin avqustun 23-də səhər saatlarında apardığı monitorinqlərin nəticələrinə əsasən, Bakıda və Abşeron yarımadasında havada olan tozun miqdarının sanitar normadan artıq olduğu müəyyən edilib. Buna səbəb Türkmənistan ərazisindən daxil olan toz dumanının atmosferin yuxarı təbəqələrinədək qalxmasıdır.
Qeyd edək ki, Bakı və Abşeron yarımadasında zəif cənub-şərq küləyinin əsməsi, yüksək nisbi rütubət və temperaturun olması ilə əlaqədar avqustun 26-dək atmosfer havasında tozun miqdarının bir qədər də artacağı proqnozlaşdırılır.
Ayyət Əhməd
