Ölkəmizdə turistlər üçün "Qaynar xətt” xidməti fəaliyyət göstərəcək. Bu barədə Azərbaycan Turizm Bürosunun Qonaq təcrübəsinin idarəedilməsi departamentinin rəhbəri Vüsal Şahbazov məlumat verib.
Departament rəhbəri bildirib ki, 24 saat ərzində ölkə daxilində və xaricində zəngləri qəbul edəcək "Qaynar xətt” ilk olaraq rus, ingilis, alman və ərəb dillərində fəaliyyət göstərəcək. Bu xidmət çərçivəsində turistlərə fövqəladə hallarda informasiya dəstəyinin göstərilməsi, nəqliyyat haqqında məlumatların verilməsi, təklif və şikayətlərin qəbul edilməsi nəzərdə tutulur.
Məlumdur ki, son illər Azərbaycana turist axını kəskin şəkildə artıb. Təbii ki, iqtisadi baxımdan bu artım ölkəmiz üçün səmərəlidir. Amma "qonaqpərvərlik” pərdəsi altında turistləri aldadan bəzi taksi sürücülərinin, satıcıların, hətta bələdçilərin olduğu da danılmazdır. Belə hallar turistlərin sayının azalması ilə bərabər ölkənin adına da xələl gətirir. Görünür, yeni sistemin yaradılması məhz bu cür məqamların aradan götürülməsi üçün nəzərdə tutulub.
Turizm üzrə ekspert Elxan Vəliyev də "Qaynar xətt”in yaradılmasını turizmin inkişafında əsas meyar olaraq görür. Ekspert "Şərq”ə bildirib ki, "Qaynar xətt”in yaradılması ölkəmizdə turizmlə bağlı məsələlərə daha ciddi yanaşıldığını göstərir:
"Son zamanlar Türkiyədə "turizm polisi” deyilən bir anlayış mövcuddur. Turizm polisləri xaricdən gələn vətəndaşları ölkənin maraqlı yerləri ilə tanış edərək bir növ bələdçi rolunu oynayırlar. Turistlərin gəzdirilməsi üçün xüsusi avtobuslardan da istifadə olunur. Bütün bunlar ölkənin şəxsi büdcəsi hesabına yerinə yetirilir.
Təəssüf ki, ölkəmizdə turistlərə qarşı hansısa hərc-mərclik, qiymət artımı və başqa cür aldadılma halları olur. Satıcıların, taksi sürücülərinin çoxu turistlərdən 2-3 qat artıq pul alırlar. Bu o deməkdir ki, bazardakı qiymətlərdə uyğunsuzluq yaranır. Beləliklə, növbəti dəfə gələn turist qruplarında azalma müşahidə olunur.
Ona görə bələdçilərin də xüsusi olaraq nəzarətdə saxlanması vacib məsələdir. Hansısa anlaşılmazlıq baş verərsə, turistlər yeni yaradılacaq "Qaynar xətt” vasitəsilə narazılıqlarını bildirə biləcəklər. Düşünürəm ki, yeni sistem turistlərin aldadılması ilə bağlı problemlərin aradan qalxmasına kömək olacaq”.
Yeganə Bayramova
