Sabiq millət vəkili, xalq şairi Sabir Rüstəmxanlı "Şərq" qəzetinin redaksiyasında, "Cümhuriyyətçi jurnalistlərin varisləri ilə görüşdə Azərbaycanda rus və digər əcnəbi dillərə meylin artması ilə bağlı narahatlıq ifadə edib. Hətta xalq şairi məlum vəziyyətə şahidi olduğu ağrılı bir fakta diqqət çəkib:
"Kitab mağazalarının birində anası ilə rus dilində danışan bir uşaqdan soruşdum ki, niyə Azərbaycan dilində danışmırsan ? Cavab verdi ki, Azərbaycan dilini sevmirəm. Uşağa anasının yanında «südünə lənət» deməkdən başqa çarəm qalmadı. Azərbaycan anaları ana dilini öz övladına sevdirməlidirlər. Bir uşağın ana dilindən xoşu gəlmirsə, bu, doğma dilimizi ona sevdirməyən ananın günahıdır”.
Son vaxtlar cəmiyyətdə mənfi tendensiya olaraq gündəmə gələn ana dilinin sevilməməsi ilə bağlı əksər ziyalılarımız həyəcan təbili çalırlar. Onlar digər dillərin uşaqlara əlavə dil kimi öyrədilməsini, ana dilini isə hər bir azərbaycanlının sevərək, mükəmməl bilməsini təbliğ edirlər.
Türkoloq, filologiya elmləri doktoru, professor Firuddin Cəlilov da "Sherg.az"a açıqlamasında məlum halın geniş xartakter aldığını təsdiqlədi. Professor övladları və nəvələrinin ana dilində danışdığını, digər xarici dilləri də öyrəndiyini söyləyib:"Əlavə xarici dil öyrənməyin heç bir qorxusu yoxdur. Amma ana dilini sevməmək, azərbaycanlı ola-ola öz dilindən imtina etmək artıq neqativ nəticədir. Bu valideynlərdən – anadan irəli gəlir. Çünki atalardan çox analar övladlarının tərbiyəsi ilə məşğul olur, onları istiqamətləndirirlər. Ana övladını hansı dildə danışdırsa, ona hansı dili sevdirsə, uşaq da bunu nümunə götürəcək.
Sabir bəy haqlıdır, günah anadadır. Ana dili ana südü kimi müqəddəs məfhumdur. Ana dili ilə böyüməyən uşağın gələcəkdə milli duyğuları da sual altında olacaq. Əksəriyyət övladını rus dilində təhsilə meylləndirir.
Rus dili xarici dil kimi öyrənilməlidir, amma uşağı körpəlikdən rus məktəbinə qoyurlar, rusca dilini açır, rusca oxuyur. Bu vəziyyətin nəticələri dəhşətli olacaq".
Aysel Aslan
