"Hazırda Xəzərin hüquqi statusu haqqında konvensiya ilə bağlı danışıqlar yekunlaşıb. Aktauda keçiriləcək sammitdə yekun sənədin ratifikasiyası gözlənilir”.
Bunu "Sherg.az”a avqustun 12-də baş tutacaq sammit haqqında proqnozlarını səsləndirərkən politoloq İlqar Vəlizadə söyləyib.
Onun sözlərinə görə, Xəzərin hüquqi statusu barədə konvensiya imzalandıqdan sonra Xəzəryanı ölkələr arasında yeni iqtisadi münasibətlər formalaşacaq:
"Xəzərin statusuna dair hüquqi bazanın formalaşdırılması ölkələr arasında iqtisadi əlaqələrin möhkəmlənməsi üçün əsas rolunu oynayacaq. Bunun fonunda Xəzəryanı ölkələrin dəniz limanı infrastrukturundan, bu sahənin inkişafından danışmaq olar. Bütün Xəzəryanı ölkələrdə son vaxtlar nəqliyyat infrastrukturu inkişaf etdirilir, limanlar qurulur, azad iqtisadi zonalar təşkil edilir. Konvensiyanın imzalanması bu sahələrin daha da inkişaf etdirilməsinə, azad iqtisadi zonaların artırılmasına şərait yaradacaq.
Xəzərin hüquqi statusu haqqında konvensiya müəyyən dərəcədə gecikmiş addımdır. Bütün ölkələrdə gedən inkişafı nəzərə alaraq, konvensiya ətrafında baş tutacaq iqtisadi uğurlar daha da çoxalacaq. Xəzər dənizi ətrafında iqtisadi infrastruktur, ölkələrin nəqliyyat əlaqələri güclənəcək”.
Qeyd edək ki, avqustun 12-də Aktauda Xəzəryanı ölkələrin dövlət başçılarının V sammiti keçiriləcək. Sammitdə Azərbaycan, İran, Qazaxıstan, Rusiya və Türkmənistan prezidentlərinin iştirakı gözlənilir.
Bundan əvvəl avqustun 11-də isə Xəzəryanı dövlətlərin Xarici İşlər Nazirləri Şurasının (XİNŞ) iclası baş tutacaq.
Aysel Aslan
