"Ermənistanla olan diplomatik danışıqlar nəticə vermirsə, deməli, son çıxış yolu müharibədir”.
Bu sözləri "Sherg.az”a açıqlamasında politoloq Tofiq Abbasov deyib.
Ekspertin sözlərinə görə, istər Robert Koçaryanın və Serj Sarkisyanın, istərsə də Paşinyanın dövründə Ermənistan meydandan qaçmasaydı, yəqin ki, mövcud danışıqlardan bir nəticəyə gəlmək olardı:
"Ermənistanla hər zaman danışıqlar aparılırdı. Hətta bir neçə dəfə anlaşmaya da yaxınlaşmışdılar. Amma son məqamda yenə də Ermənistan oyunbazlıq edərək əldə olunmuş taktiki razılıqların strateji anlaşmaya çevrilməsinə imkan vermədi. Bütün dünya bunu bilir ki, Ermənistan həm siyasi cəhətdən, həm də hərbi-texniki cəhətdən Azərbaycandan qat-qat zəifdir. Bunu biz yox, xarici ekspertlər deyir.
Onların qənaəti bundan ibarətdir ki, Azərbaycan hərbi sənaye baxımından Ermənistanı ən azı 4 dəfə üstələyir. Aprel döyüşləri də bunu təsdiq etdi. Ermənistan elə hey deyirdi ki, biz qalibik və torpaqlar bizimdir. Onlar hələ ki, çətinliklə torpaqları saxlaya bilirlər. Ona görə yox ki, Azərbaycanın qüdrəti yoxdur. Ona görə ki, Azərbaycan siyasi proseslərin hamısını nəzərdən keçirir və çalışır ki, müharibə olmasın.
Nikol Paşinyanın xanımı dəfələrlə dedi ki, Qarabağda həlak olmuş uşaqların hamısı qurbanlardır.
O, dolayısı yolla bildirirdi ki, müharibəni saxlamaq və Azərbaycanla razılığa gəlmək onun ərinin iqtidarında deyil. Ona görə də bu adamın gücü çatmır desin ki, "mən müharibə etmək istəmirəm, gəlin torpaqları qaytaraq və danışıqlar aparaq”.
T.Abbasov bildirib ki, xarici işlər naziri E.Məmmədyarovun bəyanatı artıq son mesaj anlamına gəlir:
"Nazir açıqlamasında ermənilərə başa salır ki, artıq seçim yoxdur. Ya danışıqlar, ya da ki müharibə. Əgər xarici işlər naziri açıq bəyanat verirsə, deməli bu, zarafat deyil. Ona görə də artıq ermənilər öz günlərinə ağlamalıdırlar”.
Qeyd edək ki, xarici işlər naziri Elmar Məmmədyarov Dağlıq Qarabağ münaqişəsi ilə bağlı açıqlama verərək bildirib ki, ermənilər onunla razılığa gəlməsələr, Zakir Həsənovla anlaşmalı olacaqlar.
Yeganə Bayramova
