Yaponiyada keçirilən "Tourism Expo Japan” sərgisində Ermənistan tərəfi növbəti təxribata əl atmağa çalışıb. Ermənilər uzaq Şərqdə Azərbaycanın işğal olunmuş ərazilərində yaradılmış qondarma rejimi təbliğ edən materiallar yerləşdirməyə cəhd göstəriblər. Xarici İşlər Nazirliyindən verilən məlumata görə, Yaponiyadakı səfirliyimizin vaxtında müdaxiləsi ilə qondarma rejimin siyasi təbliğatının qarşısı alınıb.
Nəticədə beynəlxalq sərgidə Azərbaycan stendinin təqdim olunması ilə ölkəmizin turizm potensialı barədə Yaponiya ictimaiyyətinə obyektiv məlumat çatdırılıb. Əslində düşmən ölkənin lobbisi dünyanın əksər dövlətində çirkin təbliğatla məşğul olur. Ermənistanın təxribat xarakterli addımlarının bəzisi zərərsizləşdirilsə də, təəssüflər olsun ki, bir sıra addımların qarşısını almaq mümkün olmur. Nəticədə ermənilər istədikləri kimi yalan təbliğatla məşğul olur, Dağlıq Qarabağı Ermənistanın "ərazisi” kimi təqdim edirlər.
Tez-tez xarici səfərlərdə olan tanınmış jurnalist, siyasi şərhçi Azər Həsrət "Şərq”ə açıqlamasında deyib ki, erməni təxribatları ilə mübarizə aparmağın çox sadə yolu var. Ekspertin sözlərinə görə, bir an öncə müdafiədən çıxıb, hücuma keçməliyik:
"Yəni oturub gözləməməliyik ki, ermənilər hardasa nəsə edəcək, biz də onun qarşısını alacağıq. Demək istədiyim odur ki, xaricdəki nümayəndəliklərimiz daha fəal olmalıdır. Düşmənin istənilən addımı, hətta niyyəti əvvəlcədən zərərsiz hala gətirilməlidir. Təəssüf ki, bir çox səfirliklərimizin varlığı ilə yoxluğu bilinmir. Ermənilər də bu fürsətdən belə istifadə edirlər. Meydanı boş qoymaq olmaz. Biz olmayan yerdə mütləq ermənilər olacaq”.
İsmayıl
