Valideynlərin gileyləndiyi məqamlardan biri məktəbli çantalarının həddindən artıq ağır olmasıdır. Bu mövzuda dəfələrlə müxtəlif müzakirələr aparılsa da, mövcud durum dəyişmir. Dərs yükü azmış kimi, məktəblilərin digər "dərd”i ağır çantalardır.
Həkimlər də ağır çantaların uşaqlar üçün təhlükəli olduğu bildirirlər. Belə ki, normadan çox ağırlıq onurğa sütununun əyilməsinə gətirib çıxara bilir. Digər tərəfdən isə özündən ağır çantanı məktəbə daşıyan şagird dərs başlamamış yorulur.
Sözügedən məsələ ilə bağlı narahatlıq duyduğunu deyən yazıçı Mirmehdi Ağaoğlu "Sherg.az”a açıqlamasında məktəbli çantaların həddindən artıq ağır olduğunu deyib:
"Son zamanlar təkərli çantalar dəb halını alıb, heç olmasa, uşaqlar onu az da olsa daşıya bilirlər. Fikrimcə, kitablar hazırlananda elə bir standart olmalıdır ki, uşaqların çantası mümkün qədər yüngül olsun. Eyni zamanda dərslər elə bölünməlidir ki, 1-3-cü sinif uşaqları daha çox şifahi yönləndirilsinlər.
Bəzən görürsən ki, şagird məktəb çantasından əlavə əmək dərsi və yemək üçün də 2 çanta daşıyır. Elə bil, uşaq kəşfiyyatçı əsgərdir və düşmən ərazisinə kəşfiyyata gedir. Heç kəşfiyyatçılar elə yüklənmirlər. Bu da uşaqların psixologiyasına təsir göstərir.
Çünki yorulurlar, çantanı apara bilmirlər. Çantalar üçün standart çəki müəyyənləşdirilməlidir. Burada elə də böyük riyazi əməliyyat yoxdur. Dünyanın qabaqcıl təhsil sistemlərində müəyyən standartlar var. Bəzi ölkələrdən nümunələr götürmək olar. Düşünürəm ki, uşağın çantasının çəkisi özü daşıya biləcək qədər olmalıdır.
Dərslərin bölgüsü elə seçilməlidir ki, uşaqlar dərsə daha az yüklə gedə bilsinlər. 1-ci sinif uşağı özündən ağır çantanı götürür və dərsə gedib çatana kimi artıq yolda yorulur. Bütün bunlar uşağın onurğası üçün də zərərlidir. Uşaq dərslərdən bezir. Halbuki şagirdlər məktəbə sevgi ilə getməlidir. Ümumiyyətlə, 1-5-ci sinfilərdə məktəb daha çox əyləncə üzərində qurulmalıdır, şagird yüklənməli deyil”.
Yeganə Bayramova
