Azərbaycanda yumurtanın və toyuq ətinin qiyməti artıb. Məhsulların əvvəlki və sonrakı qiymətlərinin arasında 80-90 faiz artımın olması əhalinin ciddi şəkildə narazılığına səbəb olub. Ekspertlər bu qiymət artımının quş yeminin bahalaşması ilə izah edir.
Məsələyə aydınlıq gətirən iqtisadçı-ekspert Nazim Bəydəmirli "Sherg.az”a bildirib ki, quş əti və yumurtada maya dəyərinin əsasını yem məhsulları təşkil edir:
"Ölkəmizdə istehsal olunan yem məhsulları daxili təlabatı tam ödəmir. Buna görə də, quşlar üçün hazırlanan yemlər və onların tərkibindəki konsentratlar, proteinlər və digərlər məhsullar xarici ölkələrdən idxal olunur.
Həmin məhsullar Türkiyə, Ukrayna, Rusiya və Qazaxıstandan gətirilir. Hazırda istifadə olunan yem ehtiyatları ötən il idxal olunan və ya öz fermerlərimizin istehsal etdiyi məhsullarıdır.
Amma biçin dövrünün yeni başladığı üçün iyun, iyul aylarında bu sahədə keçid dövrü yaranıb. Bununla da bağlı olaraq yem məhsullarının qiyməti artıb. Yemin qiymətinin qalxmasından dolayı quş ətinin və yumurutanın qiymətində bahalaşmalar olub.
Bizim kənd təsərrüfatında bütün sahələr normal inkişaf etsəydi, belə bir hal yaşanmazdı. Hazırda istər paryaxtda, istərsə də rayonlarımızda yerləşən yem zavodları daxili tələbatı tam ödəyə bilmir.
Çünki həm bu sahədə zavodların sayı azdı, həm də onların texniki vasitələri müasir standartlara cavab verəcək səviyyədə deyil. Bu sahələrdə stabillik yaransa, belə bir qiymət artımı ilə heç vaxt qarşı-qarşıya gəlmərik.
Fikirimcə, Quşçular Birliyi və Kənt Təsərüfatı Nazirliyi daha çox yerli məhsullar hesabına istehsal sahəsi qurub, onun saxlanılmasını və il boyu tarazlı olaraq bazara çıxarılmasını təmin etmək üçün müxtəlif infrastuktur qurmalıdır”.
Kənan Eynuroğlu
