Abşeron yarımadası üzrə 7 sürüşmə sahəsində - Bayıl dərəsi, Badamdar, Zığ-1, Qaraçuxur sahələri, Zəli gölü, Nübar massivi, Günəşli yaylasında, eyni zamanda, bölgələrdə mütəmadi olaraq monitorinqlər aparılır.
Bu barədə "Report"a Geoloji Kəşfiyyat Agentliyinin İdarə heyətinin sədri Əli Əliyev bildirib.
O deyib ki, hazırda sözügedən sürüşmə sahələrində ciddi aktivləşmə müşahidə olunmur: "Badamdar sahəsində ötən il baş vermiş sürüşmə prosesindən sonra bərkitmə və bərpa işləri davam edir. Zəli gölü, Nübar sahəsi və qismən Günəşli yaylasında isə zəif aktivlik qeydə alınıb".
Onun sözlərinə görə, sürüşmələr texnogen, geoloji və mövsümi xarakterli səbəblərdən baş verir: "Mövsümi xarakterli intensiv və böyük həcmli yağıntıların düşməsi sürüşmə proseslərində aktivlik yarada bilər. Son həftələrdə baş vermiş yağıntılardan sonra ekzogen geoloji proseslərin dinamikasında ciddi dəyişiklik müşahidə olunmayıb”.
Agentliyin sədri onu da vurğulayıb ki, regionlarda yağan yağışlardan sonra lokal aktivləşmələrin baş verməsinə baxmayaraq, sürüşmə ərazilərində ciddi dəyişikliklər qeydə alınmayıb, yeni sürüşmə zonaları müşahidə edilməyib.
