Suriyanın keçmiş prezidenti Bəşər Əsədin tərəfdarları Latakiyanın şərqində M4 magistralındakı Əl-Muxtariyyə körpüsünü tutublar.
Bu barədə ərəb mətbuatı məlumat yayıb.
Qeyd edək ki, ötən gün Əsəd tərəfdarları ilə Suriya Təhlükəsizlik İdarəsinin əməkdaşları arasında baş verən toqquşmada 48 nəfər ölüb. Bu gün Suriya hökumətinə tabe olan silahlı qüvvələr keçmiş prezident Bəşər Əsədi dəstəkləyən silahlı birləşmələrlə mübarizə aparmaq üçün Latakiya və Tartus şəhərlərinə daxil olub.
Siyasi şərhçi Həşim Səhrablı "Sherg.az"a bildirib ki, Suriyada Əsəd rejiminin devrilməsindən sonra hər nə qədər yeni hakimiyyət qurulsa vəƏhməd Əş-Şəranın rəhbərliyi ilə devrimçi qüvvələr iqtidarı ələ alsa da, bəzi bölgələrdə hələ mərkəzi hakimiyyətə tabe olmaq istəməyən qüvvələr özbaşına fəaliyyətlərini davam etdirirlər:
"Suriyada fəaliyyət göstərən YPG, PKK kimi qrupların tək məqsədi öz muxtar idarəetmələrini formalaşdırmaq, o cümlədən zaman-zaman bunu müstəqil dövlətə çevirməkdir. Hər birinin də arxasında fərqli-fərqli ölkələrin dayandığı heç kimə sirr deyil. Belə olan halda Əş-Şəra hakimiyyəti Suriyada bütün özbaşınalıqlara son qoymaq və dövləti yenidən mərkəzi hakimiyyətə tabe hala gətirmək, onu gücləndirmək üçün addımlar atacaq. Suriya Prezidenti hərbi əməliyyatların icrasını ilk növbədə beynəlxalq əlaqələrini tam şəkildə bərpa etdikdən sonraya saxlamışdı. Əhməd əş-Şəraya tabe olmaq istəməyən qüvvələr və onların havadarı olan xarici dövlətlər bunun fərqindədirlər. Ona görə də indiki halda Suriyada sabitliyi pozmaq əsas məsələ kimi gündəliyə çıxdı. Əslində bu, onların axırıncı şansı da ola bilər. Çünki əgər Suriya hakimiyyəti beynəlxalq əlaqələri normallaşdırsa və özünü dünyada tanıtdırsa, iqtidarı gücləndirsə, ölkənin xarici dövlətlərlə əlaqələri yüksək səviyyəyə çatacaq. Ondan sonra hökumətə qarşı mübarizə aparmaq, məğlub etmək asan olmayacaq".
Şərhçi əlavə edib ki, müxalif terrorçulara rəhbərlik edən generalın məhz İran hakimiyyəti ilə müəyyən dərəcədə əlaqələrin olduğu xəbərləri yayılıb:
"Bu, onu göstərir ki, artıq məsələ Bəşər Əsədi də aşır. Əslində bütün bunlar Əsədin iradəsi ilə baş vermir. Üstəlik, İran Suriya və Livanda dəstəklədiyi terror qruplarıyla əlaqəsini itirmək istəmir və bölgədə təsirinin azalması ilə razılaşmır. Lakin nəticə olaraq Əhməd əş-Şəranın üstünlüyü öz əlinə alıb və silahlı birləşmələrə ciddi zərbə vurublar. Əgər İranın dəstəklədiyi üsyançılar mübarizəni sona qədər davam etdirmək istəsələr, bu, onların tamamilə məhv olması, əksəriyyətinin həyatını itirməsi ilə nəticələnəcək".
