Gürcüstanda 250-yə yaxın məscid müsəlman icmasının ixtiyarına verilib.
Teleqraf xəbər verir ki, bu barədə ölkənin Dini Məsələlər üzrə Dövlət Agentliyinin rəhbəri Zaza Vaşakmadze Türkiyənin Əziz Mahmud Hüdayi Vəqfinin nümayəndələri ilə görüşdə bildirib.
Onun sözlərinə görə, Gürcüstan hökuməti 2014-cü ildən müsəlman icması daxil olmaqla, bütün dini icmalara maliyyə yardımları ayırır və vəsaitin həcmi ildən-ilə artır.
Agentlik rəhbəri Gürcüstanda İslamın unikal fenomenindən danışıb, dünyadakı münaqişələr fonunda şiələr və sünnilərin bir məsciddə ibadət etdiyini və dinc harmoniyada yaşadıqlarını söyləyib. O vurğulayıb ki, Gürcüstan hökuməti bu məsələyə böyük həssaslıqla yanaşır.
Qeyd edək ki, Gürcüstanda əhalinin 10%-dən çoxu İslam dininə etiqad edir. Qonşu ölkədə 300-dən çox məscid var. İbadət yerləri dövlət qeydiyyatına alınandan sonra müsəlman icmasına təhvil verilir.
