Gürcüstanın müsəlman icmasının ixtiyarına verilmiş məscidlərin sayı 262-yə çatıb.
Teleqraf-ın yerli bürosu xəbər verir ki, bu barədə ölkənin Dini Məsələlər üzrə Dövlət Agentliyinin rəhbəri Zaza Vaşakmadze Dini Qurumlarla İş üzrə Dövlət Komitəsinin sədri Ramin Məmmədovla keçirdiyi görüşdə bildirib.
O, Gürcüstan dövlətinin müsəlman icması da daxil olmaqla dini təşkilatlara göstərdiyi maliyyə yardımından danışıb. Agentlik rəhbəri məscidlərin müsəlman icmasına təhvil verilməsi prosesinin davam etdirildiyini diqqətə çatdırıb.
R.Məmmədov öz növbəsində Gürcüstanda yaşayan azərbaycanlıların dini və etnik mənsubiyyətlərini qoruyub saxlamaları üçün hər cür şəraitin yaradıldığını qeyd edib.
Görüşdə iki qurum arasında əməkdaşlıq aspektləri, Gürcüstandakı müsəlman icmasının və Azərbaycanda gürcü pravoslav icmasının dini hüquqlarının müdafiəsi məsələləri də müzakirə olunub.
Qeyd edək ki, Gürcüstanda əhalinin 10%-dən çoxu İslam dininə etiqad edir. Qonşu ölkədə 300-dən çox məscid var. İbadət yerləri dövlət qeydiyyatına alınandan sonra müsəlman icmasına təhvil verilir.
