"Ordumuzun cari ilin sentyabrın 19-20-də həyata keçirdiyi lokal xarakterli antiterror tədbirləri nəticəsində Azərbaycan əzəli torpaqları olan Xankəndi, Xocalı, Ağdərə, Xocavənd şəhərlərinə və Əsgəran qəsəbəsinə nəzarəti tam bərpa etdi. Artıq ərazi bütövlüyümüz və suverenliyimiz bərpa olunduğu üçün işğaldan azad olunmuş şəhər və rayonlarda bütün istiqamətlərdə olduğu kimi, təhsil sahəsində də ciddi addımlar atılır, yeni tədris müəssisələri yaradılır. Misal olaraq, Zəngilan rayonunun Ağalı kəndində, Tərtər rayonunun Talış kəndində, Füzuli, Laçın və Şuşa şəhərlərində məktəblər tikilib. Onların əksəriyyəti isə istifadə üçün hazır vəziyyətdədir. İşğaldan azad olunmuş ərazilərdə təhsil sahəsində görülən işlərin davamı olaraq bir neçə gün əvvəl Prezident İlham Əliyev Xankəndidə “Qarabağ Universitetinin yaradılması haqqında” Sərəncam imzalayıb".
Bu fikirləri "Sherg.az"a açıqlamasında Xankəndidə təhsilin önəmi barədə danışan siyasi şərhçi Elmir Səftərov söyləyib.
O, bildirib ki, XlX əsrdə regionda baş verən müharibələr güc balansının dəyişməsinə gətirib çıxardı:
"Bununla da erməni dövlətinin yaradılması üçün bəzi ölkələr tərəfindən zəmin hazırlandı. Müxtəlif dövlətlərin ərazilərində olan ermənilər mərhələlərlə Azərbaycan torpaqlarına köçürülməyə başlandı. Nəticədə isə azərbaycanlılar deportasiyaya məruz qaldılar. Hegemon dövlətlərin uzun illər üçün planlaşdırdığı məsələlərdən biri də ermənilərin Qarabağa köçürülməsi və orada məskunlaşması idi. Bu da tarixə istinadla sonrakı yüzilliklərdə Azərbaycan torpaqlarına iddia edilməsi məqsədinin bir hissəsi idi ki, ölkəmiz də bundan əziyyət çəkdi. Xankəndi də uzun illər ərzində erməni separatçılarının mərkəzinə çevrildi, orada
qondarma dövlət strukturları yaradıldı. Bu gün isə Xankəndi artıq azaddır və orada Qarabağ Universiteti yaradılır. Bu məsələ Azərbaycanda elmin inkişafı ilə yanaşı, siyasi cəhətdən də öz aktuallığı ilə diqqətləri üzərinə çəkir".
Ekspert, qeyd edib ki, Qarabağ və Şərqi Zəngəzurda işğaldan əvvəl təkcə Xankəndidə Universitetin olması şəhərin önəmini daha da artırır:
"Gələcək illərdə də Xankəndi Universitetin fəaliyyəti Qalib Azərbaycanın yaratdığı yeni reallıqlar fonunda erməni cinayətlərinin dünya ictimaiyyətinə elə separatçıların bir vaxtlar olduğu yerdən elmi tədqiqatlarla, yazılan məqalələrlə çatdırılmasına imkan verəcək. Gələcəkdə Universitetdə xarici tələbələrin də təhsil almasına şərait yaradılacağını ehtimal etmək olar.Bu da Azərbaycan həqiqətlərinin təbliğində böyük rol oyanacaq və düşmənə göz dağı olacaq. Digər bir məsələ isə Xankəndiyə qayıtmaq istəyən ermənlərin Qarabağ Universitetində Azərbaycan dilində təhsil alması, Zəfər tariximizin öyrənilməsi, dövlətçilik ənənələrimizi mənimsəməsi gələcək perspektivlər baxımından böyük əhəmiyyət kəsb edir".Qeyd edək ki, Xankəndi şəhəri Ermənistanın və Qarabağdakı erməni separatçılarının işğalı altına düşməmişdən əvvəl orada 1969-cu ildə yaradılan Xankəndi Pedaqoji İnstitutu Azərbaycan Pedaqoji İnstitutunun filialı kimi fəaliyyət göstərirdi.
