Ermənistanın Baş naziri Nikol Paşinyan Fransa Prezidenti Emmanuel Makronla telefon danışığı aparıb.
Bu barədə Ermənistan KİV məlumat yayıb.
Bildirilib ki, hökümət rəhbəri “Ermənistan və Azərbaycan arasında sülh və dövlətlərarası münasibətlərin yaradılması haqqında Saziş” layihəsinin mətninin təsdiq edilməsi və saziş layihəsinin mətninin təsdiqi ilə bağlı danışıqların başa çatdırılması barədə Fransa Prezidentinə məlumat verib.
Tərəflər Ermənistan-Fransa, Ermənistan-Avropa İttifaqı münasibətlərini, eləcə də Cənubi Qafqaz regionu ilə bağlı digər məsələləri də müzakirə ediblər.
Politoloq Aqşin Kərimov "Sherg.az"a bildirib ki, Azərbaycan və Ermənistan arasında sülh gündəmi üzrə saziş layihəsinin mətninin razılaşdırılması, sülhə olan ümidləri və perspektivləri gücləndirir:
"Lakin bu razılaşmaların diplomatik-siyasi müstəvidə açıq şəkildə bəyan edilməsindən sonra iki mühüm hadisə diqqət çəkdi.
Birincisi, Ermənistan Azərbaycanla sərhəddə hərbi təxribatlar törətdi. İkincisi, Ermənistanın Baş naziri Nikol Paşinyan Azərbaycanla münasibətlərdə təhlükəli mövqe sərgiləyən Fransa Prezidenti Emmanuel Makrona sülh layihəsi ilə bağlı məlumat verdi. Bundan əlavə, Paşinyan Rusiya və İran prezidentləri ilə də danışıqlar apardı. Bu isə onun regionda İran, Rusiya və Fransa ilə güclü münasibətlər qurmağa çalışdığını göstərir.
Lakin bu planın həyata keçməsi sual altındadır. Çünki Fransanın Cənubi Qafqazdakı sülh təşəbbüsləri Azərbaycanın maraqları və strateji məqsədləri ilə üst-üstə düşmür. Üstəlik, Fransa hazırda qlobal səviyyədə ciddi risklərlə qarşılaşır və onun geosiyasi maraqları müxtəlif təhlükələrlə üz-üzədir. Bu baxımdan, Fransa Cənubi Qafqazı öz təsir dairəsini genişləndirmək üçün bir məkan kimi görməkdədir".
Politoloq əlavə edib ki, Azərbaycan və Türkiyə strateji müttəfiqliyi isə Fransanın strategiyasını şaxələndirməsinə imkan verməyəcək:
"Belə olan halda, Makron bölgədə daha çox qarışıqlıq yaratmaqda maraqlıdır. Çünki Fransanın xarici siyasətində xaos və qeyri-sabitlikdən istifadə edərək strateji məqsədlərinə çatmaq tendensiyası mövcuddur. Məhz bu kontekstdə Nikol Paşinyanın telefon diplomatiyası müəyyən suallar doğurur və sülh perspektivləri fonunda bəzi problemləri ön plana çıxarır".
