“Ermənistan Baş naziri Nikol Paşinyan hakimiyyətdən uzaqlaşdırılmalıdır”.
Teleqraf xəbər verir ki, bunu Ermənistanın Masis şəhərinin meri, parlamentdəki müxalif “Şərəfim var” fraksiyasının baş nazirliyə namizədi Davit Ambarsumyan deyib.
“Elə günləri yaşayırıq ki, ölkəmizdə baş verən hər bir sonrakı hadisə şüurlu və vətənpərvər vətəndaşlar arasında çoxdan inanılan həqiqəti sübuta yetirir: Nikol Paşinyan Ermənistanın qubernatoru vəzifəsindən uzaqlaşdırılmalıdır. Bu, təkcə siyasi gündəm deyil. Bu, həyati bir zərurətdir, gecikməsi geri dönməz nəticələrlə doludur. Dərhal hərəkətə keçməyin vaxtıdır”, - o bildirib.
Davit Ambarsumyan vətəndaşları sentyabrın 26-da saat 12:00-da parlamentin binası qarşısında toplaşmağa çağırıb.
Xatırladaq ki, onun namizədliyi apreldə sabiq prezident Serj Sərkisyanın sədri olduğu Respublika Partiyasının İdarə Heyətinin təqdimatı əsasında bu partiyanın parlamentdəki fraksiyası tərəfindən irəli sürülüb. Partiyanın məqsədi Baş nazir Nikol Paşinyana qarşı impiçment prosesini başlatmaqdır.
