“Bu gün opponentlərimiz hansı bəyanatlar versələr də, obyektiv olmasalar, gürcü cəmiyyəti onlara reaksiya verməyəcək”.
Teleqraf xəbər verir ki, bunu Gürcüstanın hakim “Gürcü Arzusu” partiyasının fəxri sədri Bidzina İvanişvili yerli hakimiyyət orqanlarına seçkilərdə səs verdikdən sonra jurnalistlərə deyib.
“Opponentlərimiz (müxalifət) bu gün hansı bəyanatlar versələr də, obyektiv olmasalar, Gürcüstan cəmiyyəti onlara reaksiya verməyəcək. İnsanlar ağı qaradan ayırmağı, düzgün seçim etməyi öyrənib. Ümid edirəm ki, bu gün cəmiyyət fəal olacaq, onlar imkan daxilində seçki məntəqələrinə gedəcək və düzgün seçim edəcəklər”, - İvanişvili deyib.
Xatırladaq ki, bu gün Gürcüstanda yerli hakimiyyət orqanlarına seçkilər keçirilir.
Müxalifət hakimiyyəti dinc yolla devirmək məqsədi ilə bu gün kütləvi etiraz aksiyası təşkil etməyi planlaşdırır. Vahid Milli Hərəkat Partiyasının keçmiş rəhbəri Levan Xabeişvili və eyni partiyadan olan Tbilisi Şəhər Şurasının üzvü Zviad Kuprava Bidzina İvanişvili hökumətinin devrilməsinə çağırışlara görə həbs edilib.
