“Qarabağ” neft yatağının işlənməsi layihəsi hazırda Konseptin Hazırlanması üzrə Tədqiqatın (Concept Development Study) işlənilməsi mərhələsindədir.
"APA-Economics" xəbər verir ki bu barədə “BP” şirkətinin Xəzər regionu üzrə vitse-prezidenti Bəxtiyar Aslanbəyli jurnalistlərin layihə çərçivəsində işlərin sürətləndirilib-sürətləndirilməyəcəyi ilə bağlı sualını cavablandırarkən bildirib.
Onun sözlərinə görə, hazırda yatağın öyrənilməsi, onun geocoğrafiyasının araşdırılması aparılır, yatağın hansı formada işlənəcəyi (hansı avadanlıqlar və qurğular vasitəsilə - red.) müəyyənləşdirilir. Konsept hazırlandıqdan sonra layihə çərçivəsində digər zəruri işlərin icrasına başlanacaq.
“Biz özümüz də bunun ən qısa zamanda həll olunmasında maraqlıyıq”, – deyə Bəxtiyar Aslanbəyli qeyd edib.
Bəxtiyar Aslanbəyli əlavə edib ki, “Qarabağ” yatağının ehtiyatları “Azəri–Çıraq–Günəşli” (AÇG) neft-qaz blokuna nisbətən xeyli az olsa da, bu layihə də BP üçün prioritetli hesab olunur.
Xatırladaq ki, bu ilin iyunun 3-də BP Xəzər dənizinin Azərbaycan sektorunda yerləşən iki dəniz kəşfiyyat və işlənmə blokunda iştirak payları almasını başa çatdırdığını elan edib. Sövdələşməni rəsmiləşdirən sazişlər bu gün bp və SOCAR arasında Bakı Enerji Həftəsi çərçivəsində imzalanıb.
Birinci blok Bakıdan 120 km şərqdə, Günəşli yatağından 20–25 km məsafədə, suyun 150–200 metr dərinliyində yerləşən Qarabağ neft yatağıdır. Yatağın işlənməsi üzrə 2018-ci ildə imzalanmış Risk Xidməti Sazişi (RXS) mövcuddur.
İkinci blok Bakıdan 90–110 km şimal-şərqdə, suyun 80-180 metr dərinliklərində yerləşən Əşrəfi – Dan ulduzu – Aypara (ADUA) sahəsidir. Bu sahə bir sıra mövcud kəşf olunmuş və perspektiv strukturları əhatə edir. ADUA sahəsinə aid hasilatın pay bölgüsü sazişi (HPBS) də 2018-ci ildə imzalanmışdır.
BP iki sazişin - RXS və HPBS, hər birində SOCAR-dan 35%-lik iştirak payı alıb. Hər iki sazişdə qalan 65%-lik iştirak payını SOCAR özündə saxlayacaq. BP hər iki müqavilə üzrə operator olacaq.
