Avropa İttifaqı (Aİ) dünyanın aparıcı humanitar yardım donoru olaraq qalır və bu məqsədlə Cənubi Qafqaz və Mərkəzi Asiya üçün 5 milyon avro ayıracaq.
“Report” “İnterfaks”a istinadən xəbər verir ki, bu barədə Avropa Komissiyası (AK) məlumat yayıb.
“2025-ci ilin əvvəlinə olan vəziyyətə görə, 300 milyondan çox insanın humanitar yardıma ehtiyacı var. Buna görə də Aİ onlara kömək etmək öhdəliyinə sadiq qalır və təxminən 1,9 milyard avro ayıracaq. Humanitar yardım üçün ayırdığımız maliyyə yerlərdəki tərəfdaşlarımızı - BMT komandalarını, “Qızıl Xaç”ı və “Qızıl Aypara”nı, beynəlxalq və yerli hökumət və qeyri-hökumət təşkilatlarını dəstəkləyəcək”, - AK-nın böhranların idarə edilməsi üzrə komissarı Aca Lyabib bildirib.
AK-nın məlumatına görə, 2025-ci ildə Ukraynaya ilkin yardımın 140 milyon avro olması planlaşdırılır. Moldova üçün 8 milyon avro, Cənubi Qafqaz və Mərkəzi Asiya üçün 5 milyon avro ayrılıb. Bütövlükdə Yaxın Şərqə 375 milyon avro ayrılması planlaşdırılır. Şimali Afrika və Yəmənə ayrıca olaraq 95 milyon avro yardım nəzərdə tutulub.
Afrika qitəsinin əhəmiyyətli hissəsi üçün 510 milyon avro ayrılır. Ayrıca olaraq Cənubi Afrika və Hind okeanı regionu üçün 35 milyon avro ayrılacaq.
Asiya və Sakit okean regionu üçün təxminən 182 milyon avro nəzərdə tutulub. Latın Amerikası və Karib hövzəsi üçün ilkin olaraq 113 milyon avro yardım planlaşdırılır.
Lyabibin sözlərinə görə, qəfil fövqəladə hallara və gözlənilməz humanitar böhranlara cavab vermək üçün qlobal fəaliyyət üzrə 295 milyon avrodan çox əlavə “təcili maliyyələşdirmə” də nəzərdə tutulub.
110 milyon avrodan çox vəsait innovativ layihələr və siyasi təşəbbüslər, məsələn, çoxillik proqram tərəfdaşlığı və fövqəladə hallara reaksiya imkanlarının artırılması üçün ayrılacaq.
Xatırladaq ki, AK 1992-ci ildən bəri 110-dan çox ölkəyə humanitar yardım göstərir.
