"Bəzi dövlətlər işğalçı və regionda dağıdıcı ünsür kimi fəaliyyət göstərir. Rusiya hər zaman aqressiv siyasəti ilə əraziləri zəbt və sonra ilhaq edən dövlət kimi tanınır:
Bu sözlər “Sherg.az”a politoloq Natiq Miri İranın Rusiyanı PUA ilə təzhiz etməsindən danışarkən bildirib. Onun sözlərinə görə, rəsmi Moskva həmişə qonşu dövlətləri parçalayıb, separatizmi körükləyən, inkişaf etdirən bir ölkə olub:
"Həmçinin bundan istifadə edərək, özünün geosiyasi maraqlarını təmin edir. Eyni davranışlar "cırtdan" Ermənistana da aiddir. Kreml və digər havadar dövlətlərin sayəsində geosiyasi alətə çevrilərək, zaman-zaman böyük cinayətlər törədilib. Bu əməllər isə görməzdən gəlinib.
Ona görə də hər zaman Ermənistan da regionda dağıdıcı ünsür rolunda iştirak edib. Çünki bu günə qədər bizə məlum olan siyasət Ermənistanın mənafeyinə uyğun şərait yaradılıb. Rəsmi İrəvan da bu durumdan faydalanaraq, qonşu ölkələrin ərazilərini işğal, yaxud da ətraf ölkələrə ərazi iddiası ilə çıxış edib”.
Eyni vəziyyətin İrana da aid olduğunu deyən politoloq diqqətə çatdırıb ki, ən azından konstitusiyaya uyğun olaraq, İran islam ölkəsi hesab edilir. Buna rəğmən rəsmi Tehran çevrəsindəki bütün islam ölkələri ilə düşmənçilik aparır:
“Bu gün İran ərəb ölkələri ilə xüsusilə də, Səudiyyə Ərəbistanı, Birləşmiş Ərəb Əmirlikləri və digər ölkələr, o cümlədən Pakistan və Azərbaycana qarşı düşmənçilik siyasəti yürüdür.
Bu, heç kimə sirr deyil. Rəsmi Tehran Rusiya və Ermənistan kimi dağıdıcı qüvvədir. İranın yüz illər boyu məhz bu statusda çıxış etməsindən həmçinin Qərb dünyası da maraqlı olub. İndi də mövqelərini gizlətmirlər. Bütün islam dünyası ilə ədavəti olan cənub qonşumuz kimi bir bataqlığı Qərb dünyası, başda da ABŞ nəyə görə qurutmağa səy göstərsin?!
Onların susaraq, izləməsinin səbəbi rəsmi Tehranın varlığının islam dünyasının birliyinə imkan vermədiyindən irəli gəlir. Dağıtmağa meyilli ölkələr, əlbəttə, bütün şəraitdə biri-birinə dəstək olmağa davam edirlər. Çünki missiyanın tələbi eynidir. Hazırda da dini baxımdan baxışların fərqli olmasına baxmayaraq, geosiyasi maraqlar bu dövlətləri yenidən birləşdirir. Bu gün Azərbaycan əksəriyyəti şiyə toplumundan ibarət olan bir ölkədir.
İran da şiyə məzhəbinə xidmət edir. Amma rəsmi Tehran Azərbaycan-Ermənistan münaqişələrində hər zaman rəsmi İrəvana dəstək verib. Alt-üst etməyə çalışan dövlətlər təkcə özləri və ətrafları deyil, həmçinin dünya ölkələri üçün də problem yaradır".
Qeyd edək ki, Ukraynada hərbçilər işğalçıların Odessaya hücum etmək üçün istifadə etdikləri İranın hücum pilotsuz təyyarəsi "Qods Mohajer"6-nı endirməyə nail olublar. Bu barədə Publika.az Ukrayna Müdafiə Nazirliyinin səhifəsinə istinadla məlumat yayıb. "Budur, Odessaya hücumu koordinasiya etmək üçün bir neçə gün əvvəl buraxılmış İranın “Qods Mohajer-6” PUA-sı", - mesajda deyilir. Bu PUA kəşfiyyat, müşahidə, kəşfiyyat və atəşə zərər vurmaq üçün nəzərdə tutulub. Hərbçilərin sözlərinə görə, pilotsuz təyyarə 4-ə qədər yüksək dəqiqlikli sursat daşıya bilir.
