Çünki Rusiya-Ukrayna müharibəsi daha çox Tramp və Putinin gündəliyindədir
Bu gün Malayziyanın paytaxtı Kuala Lumpurda ABŞ dövlət katibi Marko Rubio ilə Rusiyanın xarici işlər naziri Sergey Lavrov arasında görüş baş tutacaq.
Bu barədə Rusiya Xarici İşlər Nazirliyi məlumat yayıb.
Qeyd edək ki, bu, Rubio və Lavrov arasında ikinci görüş olacaq.
Politoloq Taleh Əliyev Sherg.az-a deyib ki, ABŞ-ın dövlət katibi Mark Hrubi ilə Rusiya Xarici İşlər Naziri Sergey Lavrovun Malayziyanın paytaxtı Kuala Lumpurda baş tutan görüşünü mən birbaşa Rusiya-Ukrayna müharibəsi ilə əlaqələndirmir:
"Çox güman ki, bu görüşdə ABŞ ilə Rusiya arasında çoxşaxəli münasibətlər və onların inkişafı ilə bağlı müxtəlif məzmunlu mövzular müzakirə ediləcək. Çünki demək olar ki, Rusiya-Ukrayna müharibəsi daha çox Tramp və Putinin gündəliyindədir. Bu məsələ ilə bağlı tərəflərin ciddi razılıq əldə etməsi real görünmür. Razılığın mümkün olmamasının əsas səbəblərindən biri Rusiyanın hələ də öz imperialist ambisiyalarından geri çəkilməməsidir. Digər tərəfdən, ABŞ da Ukrayna ilə bağlı təkbaşına qərar verəcək gücdə deyil və ya ən azı mövcud mənzərə belə görünür. Çünki Ukraynanı kollektiv Qərb dəstəkləyir. Xüsusilə Avropa cəbhəsi və Qərb dövlətləri Ukraynaya hərbi, maliyyə, kəşfiyyat və humanitar dəstək daxil olmaqla geniş spektrdə yardım göstərirlər. Onlar bu müharibədə Ukraynanın məğlubiyyətini Avropanın öz məğlubiyyəti kimi qiymətləndirirlər. Həmçinin Ukraynanın təhlükəsizliyini Avropanın təhlükəsizliyi qədər ciddi şəkildə müdafiə edirlər. ABŞ bu məsələdə geri addım atmayacaq və Ukrayna cəbhəsində Rusiyaya qarşı ciddi güzəştlərə gedilməyəcək".
Analitikin sözlərinə görə, hazırkı görüş Rusiyayla dünyanın digər regionlarında baş verən vacib məsələlərin müzakirəsi baxımından əhəmiyyət daşıya bilər:
"Eyni zamanda, epizodik olaraq Rusiya-Ukrayna münaqişəsi ilə bağlı da fikirlər səsləndiriləcək. Çünki bu mövzuya toxunulmadan tərəflər arasında təmasların ictimaiyyətə təqdim edilməsi qeyri-səmimi görünə bilər. Hər iki ölkənin liderləri hazırda Rusiya-Ukrayna münaqişəsi ilə bağlı birbaşa danışıqlar prosesində iştirak edirlər. Amma bu danışıqlardan münaqişənin həlli istiqamətində real və pozitiv nəticələr gözləmək mənasızdır. Bu görüşü daha çox iki ölkə arasında dünyanın müxtəlif regionlarında və sahələrindəki maraqların aydınlaşdırılması və ya yenidən müzakirəsi baxımından keçirilən növbəti diplomatik təmas kimi xarakterizə etmək daha doğru olardı".
