Pentaqonun yüksək səviyyəli rəsmisi Rusiyanın NATO müttəfiqləri üçün təhlükə yaratdığını bildirib. Onun sözlərinə görə, Rusiya məqsədinə çatmaq üçün hərbi gücdən istifadə edir. Pentaqon rəsmisi vurğulayıb ki, ABŞ Rusiyanın dəfələrlə təhlükəsizliyi və sabitliyi pozmağa çalışdığına dair nümunələrin şahidi olub:
“Bütün bunlara baxmayaraq, Vaşinqton qarşılıqlı maraq doğuran sahələrdə Rusiya ilə əməkdaşlıq edə bilər. Biz öz maraqlarımızı inkişaf etdirmək üçün Rusiya ilə çalışacağıq, lakin təcavüzkar hərəkətlərinə görə onları məsul hesab edəcəyik”.
Qeyd edək ki, fevralın 17-18-də Pentaqon rəhbəri Lloyd Ostinin də iştirak edəcəyi NATO-ya üzv ölkələrin müdafiə nazirlərinin videokonfrans formatında iclası keçiriləcək. Toplantıda Rusiya mövzusu müzakirə olunacaq.
ABŞ-dakı hakimiyyət dəyişikliyi geosiyasi konfiqurasiyada yeniliklərə səbəb oldu. Məsələn yaxın zamanlarda Amerika və Rusiya arasındakı gərginlik, iki dövlətin bir-birini qarşılıqlı ittiham və təhdidinin şahidi oluruq. Görəsən mövcud durum sonda müharibə ilə nəticələ bilərmi?
Sualımızı cavablandıran politoloq Məhəmməd Əsədullazadə bildirib ki, Co Bayden hakimiyyətə gəldikdən sonra Rusiyanı Amerikanın bir nömrəli rəqibi elan edib:
“Rəsmi Vaşinqton, həmçinin Rəsmi Moskvanın regionda beynəlxalq münasibətlər sistemində mövqeyini zəiflətmək üçün bütün parametrlərdən istifadə edir. Pentaqondan verilən açıqlama Rusiyaya qarşı təzyiq mexanizminin başlamasıdır. ABŞ Rusiyanın NATO-ya üzv ölkələrə təhdid olduğunu əsas gətirərək, Rusiyaya qarşı hərbi-siyasi nizam formalaşdırır.
Məsələn, Pentaqon rəsmisi bildirir ki, Rusiya NATO ölkələrinə qarşı təhdiddir. Amerika bu açıqlama ilə yeni bazalarını gətirib Avropa istiqamətində Rusiyaya qarşı yerləşdirmək istəyir.
Göründüyü kimi iki ölkə arasında ciddi qarşıdurma var. Amerika beynəlxalq münasibətlərdə yeni nizamın formalaşmasına çalışır. Amerika bu nizamla Rusiya prezidenti Vladimir Putinin çoxqütblü dünya yaratmaq stategiyasının qarşısını almağa çalışır. Vaşinqton məhz bu xüsusda da NATO müttəfiqlərini bir araya gətirəcək və Rusiyaya qarşı yeni koalisiyanın formalaşması istiqamətində işlərə başlayacaq”.
Politoloq Amerika-Rusiya arasında arasında hərbi toquşmanın olacağını düşünmür:
“Rusiya bu qarşıdurmaya getməz. Çünki bu artıq üçüncü dünya müharibəsi deməkdir. Lakin qarşıdurmanı davam etdirəcəklər. Şərqi Avropa, Ukrayna, həmçinin Belarus istiqamətində Rusiya üçün hərbi təhlükə ola bilər".
