Avropanın Ukraynaya göndərməyi düşündüyü qüvvələr arasında Türkiyənin yer alması mümkünsüzdür
Türkiyənin Avropa İttifaqına (Aİ) üzvlük hədəfi olduğu kimi qalır.
Bunu Türkiyə Prezidenti Rəcəb Tayyib Ərdoğan Avropa İttifaqının (Aİ) təşkil etdiyi Həmfikir Ölkə Liderlərinin onlayn toplantısında deyib.
Ərdoğan Avropanın təhlükəsizliyi ilə bağlı bütün addımları Türkiyə ilə birlikdə planlaşdırmağın qarşılıqlı maraqlara xidmət etdiyini əlavə edib.
O bildirib ki, Türkiyə Aİ-nin strateji və uzaqgörən münasibət bəsləməsini və üzvlüklə bağlı müzakirələri canlandırmasını gözləyir.
Türk siyasətçi və yazar Aydın Sezer “Sherg.az”a bildirib ki, Donald Tramp prezidentliyə gəldikdən sonra Rusiya ilə əlaqələrini düzəldib, Ukrayna məsələsində sülh sazişi imzalamaq mövzusunu gündəmə gətirdi:
“Avropa isə Trampın fikrinə şiddətlə qarşı çıxır. Bu proses daxilində Trampın Amerika və NATO-nun Avropa ölkələrinin yanında ola bilməyəcəyini söyləməsindən və avropalıların müdafiə xərclərini artırmalarının lazım olduğunu bildirməsindən sonra Avropada yeni Silahlı Qüvvələrin yaradılması fikri ortaya çıxdı. Xüsusilə də Avropa Silahlı Qüvvələrinin NATO-ya alternativ kimi düşünülməsi məsələsi müzakirə olundu. Belə olan halda Türkiyə həm Ukrayna, həm Avropa Silahlı Qüvvələri məsələsində önəmli rol oynacağını düşündüyü üçün Aİ-yə üzvlüyünü yenidən gündəmə gətirir. Lakin Türkiyənin Avropa Birliyinə üzvlük məsələsi Rəcəb Tayyib Ərdoğanın düşündüyü qədər rahat mümkün olacaq iş deyil. Ərdoğanın açıqlaması daxili və xarici siyasətə hesablanmış addımdır. Avropanın Ukraynaya göndərməyi düşündüyü qüvvələr arasında Türkiyənin yer alması mümkünsüzdür. Eyni zamanda Rusiya NATO ölkələrinin Ukraynaya əsgər göndərə bilməyəcəyini açıq şəkildə dilə gətirib”.
