Elşən Bağırzadə: Neftin barelindəki hər 1 dollarlıq artım dövlət büdcəsi üçün böyük həcmdə əlavə gəlir imkanı yaradır
Dünya bazarlarında "Azeri Light" (CIF) markalı Azərbaycan nefti bahalaşıb.
"APA-Economics" xəbər verir ki, Azərbaycan neftinin 1 barelə olan qiyməti ötən gün 3,41 ABŞ dolları və ya 4,13% artaraq 82,58 ABŞ dollarına bərabər olub.
Qeyd edək ki, Azərbaycan neftinin əvvəlki qiyməti 79,17 ABŞ dolları təşkil edib.
Xatırladaq ki, Azərbaycanın builki dövlət büdcəsində “Azeri Light” markalı Azərbaycan neftinin 1 barelinin orta qiyməti 70 ABŞ dollarından hesablanıb.
İqtisadiyyat üzrə fəlsəfə doktoru, dosent Elşən Bağırzadə Sherg.az-a bildirib ki, hazırda nəinki Azərbaycan nefti, digər markalı xam neftlərin də qiyməti artıb:
“Bunun hazırda yeganə səbəbi Yaxın Şərqdə baş verən hərbi-siyasi münaqişədir. Bu münaqişə neft bazarında gələcəklə bağlı gözləntiləri pisləşdirib. Artan risqlər isə təbii olaraq neftin də qiymətlərini artırır. Amerikanın münaqişəyə birbaşa müdaxiləsi baş verərsə və İran buna qarşılıq verməyə çalışarsa, hətta Hörmüz boğazını bağlamağa yönəlmiş addımlar atarsa, neft qiymətlərinin artımında çox böyük sıçrayışlar görə bilərik. Neftin qiymətinin artımı Azərbaycan büdcəsinə şübhəsiz ki, müsbət təsir göstərir. Hətta neftin barelindəki hər 1 dollarlıq artım dövlət büdcəsi üçün böyük həcmdə əlavə gəlir imkanı yaradır. Bununla bağlı hazırda konkret rəqəm vermək istəmirəm, sadəcə onu deyə bilərəm ki, qeyd edilən münaqişə qısa müddətdə bitməsə, bu əlavə gəlir Azərbaycanın dövlət büdcəsinə yenidən baxılmasını zəruri edəcək qədər böyük ola bilər”.
