“Ermənistan 30 il ərzində torpaqlarımızı işğalda saxlayıb, xalqımıza qarşı bütün vəhşilikləri törədib. Avropa Parlamenti isə bunları görməyib”
Korrupsiya yuvası Avropa Parlamenti bütövlükdə gündəmini Azərbaycana həsr edib. Çünki Azərbaycan beynəlxlaq hüququn aliliyini təmin edib. Separatizmlə mübarizədə effektiv nəticə qazanıb. Son aylarda Fransa və Avropa İttifaqının Azərbaycana münasibətdə beynəlxalq hüququn prinsiplərinə necə zidd və açıq formada qərəzli davranışlar sərgilədiyinin şahidiyik. 30 il maskalanmağa çalışan Fransa bu gün açıq formada özünü erməni dövləti kimi aparır. Lakin nəzərə almalıyıq ki, Avropa Parlamentinin nə Avropa İttifaqına, nə də Avropadakı digər siyasi təşkilatlara təsir imkanları var. Xüsusən, son beş ilin monitorinqləri və araşdırmaları da göstərir ki, bu gün Avropa Parlamentinin Aİ-yə təsir imkanları sıfırdır. ATƏT və AŞ PA-nın, ümumiyyətlə, Avropa Parlamentinin korrupsiyaya bulaşdığı lobbist dairələrin əlində siyasi oyuncağa çevrildiyi ilə bağlı çox ciddi qənaətlər var. Bu baxımdan da Avropa Parlamentinin çıxardığı “qətnamələr” ciddi hesab edilmir. Digər tərəfdən, Ermənistan baş nazirinə Avropa Parlamentində tribuna verilməsi də parlamentin nüfuzsuz olduğunun növbəti göstəricisidir.
Millət vəkili Azər Badamov "Sherg.az"a açıqlamasında deyib ki, Avropa Parlamenti korrupsiyanın içində boğulur. Deputatın sözlərinə görə, son vaxtlar Avropa parlamentariləri pul hesabına sifarişlər icra etməkdə dəfələrlə ifşa olunublar:
"Avropa Parlamenti seçkiləri zamanı erməni lobbisi bəzi namizədlərə maliyyə dəstəyi göstərərək onların çiyinlərinə müəyyən öhdəliklər qoyublar. Həm də ermənilərin təəssübkeşçisi Fransanın Avropa Parlamentinə təsir gücü böyükdür. Azərbaycana qarşı qəbul olunan qərəzli qətnamələr Fransanın və erməni lobbisinin təsiri ilə qəbul olunur. Avropa Parlamenti belə qərəzli qərarlar qəbul etməklə qurumun beynəlxalq hüquq və demokratiyadan uzaq olduğunu bir daha sübut edir. Azərbaycan dövlətinin bütün hərəkətləri beynəlxalq hüquqa söykənir. Ermənistan 30 il ərzində torpaqlarımızı işğalda saxlayıb, xalqımıza qarşı bütün vəhşilikləri törədib. Avropa Parlamenti isə bunları görməyib. Amma könüllü şəkildə Qarabağı tərk etmiş etmiş ermənilərə görə Azərbaycana qarşı qərarlar qəbul edirlər".
Müsahibimiz vurğulayıb ki, əgər Azərbaycan getmək istəyən ermənilərə dəhliz açmayaraq, onların istəklərinin reallaşmasına mane olsaydı, indi bizi "erməniləri girov saxlamaqda" günahlandırardılar:
"Yəni necə etsək də, "günahkar" oluruq. Azərbaycanın Avropa Parlamenti qarşısında heç bir öhdəliyi yoxdur. Azərbaycan öz haqqının müdafiəsinə malik ölkədir. Heç bir dövlət, o cümlədən Azərbaycan haqqının tapdanmasına imkan verməz. Avropa Parlamenti qərəzli qətnamə qəbul edirsə, bizim parlamentimiz də onu pisləyən və ədalətə dəvət edən bəyanat qəbul edir. Ümumilikdə isə Avropa Parlamentinin qərəzli qətnamələri ölkəmiz üçün dəyərsiz kağız parçasından başqa bir şey deyil".
