Sankt-Peterburqun qubernatoru Aleksandr Beqlov yaxın vaxtlarda Azərbaycana səfər edəcək.
Bu barədə APA-nın Rusiya bürosuna açıqlamasında Beqlov özü məlumat verib.
Onun sözlərinə görə, hazırda bu səfərə hazırlıq gedir.
Azərbaycan-Rusiya regionlararası əməkdaşlıq çərçivəsində Sankt-Peterburqun ölkəmizlə münasibətlərinin müsbət inkişaf etdiyini söyləyən qubernator bildirib ki, Peterburq Azərbaycanla dostluq edir və birgə layihələr həyata keçirir: "Sankt-Peterburqda böyük Azərbaycan diasporu fəaliyyət göstərir. Hazırda mənim Azərbaycana səfərimə hazırlıq gedir. Yaxın vaxtlarda Azərbaycanı ziyarət etməliyəm. Bir sıra istiqamətlərdə Azərbaycanla razılaşmalıyıq. Birgə böyük layihələrimiz var", - Rusiyanın şimal paytaxtının qubernatoru vurğulayıb.
