ABŞ-nin NATO-dan çıxması alyans daxilində Böyük Britaniya və Türkiyə tandeminin güclənməsinə gətirib çıxara bilər
ABŞ Hökumətinin Səmərəliliyi Departamentinin rəhbəri İlon Mask ABŞ-nin NATO-dan çıxması ideyasını dəstəklədiyini qeyd edib. D.Trampın İ.Maskın mövqeyini dəstəkləyəcəyi şübhəsizdir. Əgər ABŞ NATO-dan çıxarsa, bu, alyansın zəifləməsinə və V.Putinin strateji planına xidmət kimi dəyərləndirilə bilər.
Milli Cəbhə Partiyasının sədr müavini, politoloq Məhəmməd Əsədullazadənin “Sherg.az”a açıqlamasına görə, NATO beynəlxalq münasibətlər müstəvisində bir qurum kimi de-fakto fəaliyyətsizdir:
“Alyansın əsas əsgəri gücü ABŞ və Türkiyəyə məxsusdur. ABŞ-nin bu təşkilatdan çıxması, Alyans daxilində Böyük Britaniya və Türkiyə tandemini güclənməsinə gətirib çıxara bilər.
D.Trampın fəaliyyətinin yüz günündə xalqa hesabatlılığı onun prezident kimi uğurlu bir siyasi planının olmadığı aydın olacaq. Bir müddətdən sonra, verilən qərarların onun prezident kimi reytinqinə mənfi təsir edəcəyi mümkündür. D.Trampın davam etdirdiyi siyasəti onun partiyasının Konqres seçkilərində məğlub olmasına səbəb olacaq.
D.Trampın həm beynəlxalq müstəvidə, həm də daxildə mənfi imici formalaşıb. ABŞ prezidentinə dəstək verən Rusiya Prezidenti V.Putin və İsrailin Baş naziri B.Netanyahudur. Hər iki şəxs də hərbi cinayətlər həyata keçirib. Və beynəlxalq məhkəmə tərəfindən həbs edilməsi üçün order verilib”.
Politoloqun fikrincə, ABŞ administrasiyası beynəlxalq siyasi nizamı demontaj etməklə, öz daxili siyasətində ciddi strateji səhvlər edir. Əgər təkcə beynəlxalq nizamı pozurdusa, hazırda daxildə dövlətin milli təhlükəsizliyini də təhdid edir. ABŞ Kəşfiyyat Mərkəzi, Dövlət Departamenti və Pentaqonda ixtisarlar daxildə D.Trampa qarşı etiraz dalğasını formalaşdıracaq.
