Çox təəssüf ki, hər şey məhz bu cür baş verir. Bunun nə ilə bağlı olduğunu anlamaq çətindir. Təbii ki, artıq 18 yaşı çoxdan tamam olan hər bir insan kimi mən də bəzi xəstəliklərlə üzləşə bilərəm, amma xoşbəxtlikdən, bu saxtakarlıqlarda mənə aid edilən xəstəliklərlə heç bir bağlılığım yoxdur.
Sherg.az Bakupost.az-a istinadən xəbər verir ki, bunu Azərbaycanın Rusiyadakı səfiri Polad Bülbüloğlu "Novaya vremya"nın əməkdaşının onun səhhəti haqda sosial şəbəkələrdə yayılan saxta məlumatlarla bağlı sualına cavabında deyib.
"Mən yalnız güman edə bilərəm ki, vicdansız şəkildə bu dezinformasiyanı yayanlar məşhurlaşmağa və ya məşhur adamların hesabına pul qazanmağa çalışırlar. Guya Azərbaycandakı klinikalardan birində işləyən həkim deyib ki, mən infarkt keçirmişəm. İstəyirəm, bütün xeyirxahları və bədxahları sakitləşdirim, ya da məyus edim: Mən heç vaxt infarkt keçirməmişəm, təzyiqdən əziyyət çəkməmişəm, bir sözlə, haqqımda yazılanların hamısı yalandır", - deyə Polad Bülbüloğlu vurğulayıb.
O, bu tendensiyanın çox təhlükəli olduğunu bildirib:
"Çünki söhbət insanların sağlamlığından gedir. Bu yaxınlarda isə mənim səsimi saxtalaşdırdılar... Bir sözlə, fırıldaqçılar yatmır. II Şuşa Qlobal Media Forumunda da dezinformasiyalar müzakirə olundu və cənab Prezident İlham Əliyev də bu mövzuya diqqət ayırdı. Həqiqətən də, informasiya kütlələrə təsir etmək üçün çox böyük gücə malikdir. Və əgər o, dağıdıcı qüvvə daşıyırsa və ya dezinformasiyadırsa, ondan onun yayılmasının hansı nəticələrə səbəb ola biləcəyini təsəvvür edin".
