Dünyada nadir xəstəlik
İngiltərədə 21 aylıq körpə dünyada nadir rastlanan xəstəliyə tutulub. Körpənin gözləri sürətlə böyüyür və gözlərindən qan axır. Körpə kor olmaq təhlükəsi ilə üz-üzədir. “Sherg.az” “NTV.com.tr”yə istinadən xəbər verir ki, körpə Aretria Bice yaraşıqlı mavi gözlərlə dünyaya gəlib. Körpə 6 aylıq olanda gözlərindən biri süd rəngi alıb və işığa qarşı həssaslaşıb. Valideynləri həkimə müraciət edib. Müayinə zamanı körpənin gözündə optik sinir üzərində yüksək dərəcədə basqı əmələ gətirən və genetik anormallıq hesab edilən “bilateral konjenital glokom” xəstəliyi aşkarlanıb. Körpənin gözü bir neçə dəfə əməliyyat edilib. Uşağın gözünə oradakı artıq mayeni boşaltmaq üçün boru taxılıb. Lakin bu əməliyyat uğursuz olub, körpənin gözündən yenə qan axmağa başlayıb. Körpənin anası Louise Bice, “körpəmin gözlərindən qıp-qırmızı qan axırdı. Sanki bir qorxu filmini izləyirdim. İndi 6-cı əməliyyata hazırlaşırıq. Körpənin gözləri böyüməkdə davam edir. Müalicə aldıqdan sonra da gözünün ölçüsü kiçilməyib. Kor ola bilər”, söyləyib. Ana deyib ki, körpəyə daim gözlük taxırlar. Hətta gecə də gözlüyü çıxarmırlar. Çünki oyandıqda ətrafı görmədikdə çox qorxur, ağlamağa başlayır və gözündən yenə qan axır. Ana körpəsinin artıq xəstəxanadan da qorxmağa başladığını deyib: “o qədər xəstəxanalara apardıq, nə qədər əməliyyat keçirdi. Körpəm artıq xəstəxana qoxusunu aldıqda ağlamağa başlayır. Qorxur. Biz onun gözlərinin kiçilməyəcəyini bilirik, amma yenə də nəyəsə ümid edirik. Gözünün ölçüləri kiçilməsin, amma bundan artıq böyüməsin, deyə dua edirik. Rəfiqələrim, tanışlarımız uşaqlarının şəklini paylaşan kimi onların gözlərinin ölçüsünə baxıram, öz körpəmin gözləri ilə müqayisə edirəm. Bu məndə artıq psixoloji gərginlik halına gəlib”.
