Hakan Fidanın vurğuladığı kimi, ərəb ölkələrinin türk dünyası ilə birgə təşkilatlanması hədəf olmalıdır
Türkiyə xarici işlər naziri Hakan Fidan bəzi Yaxın Şərq ölkələrini ittifaq yaratmağa çağırıb. Nazir bunun bölgənin təhlükəsizliyi üçün zəruri olduğunu bildirib. H.Fidan vurğulayıb ki, çox güclü Səudiyyə Ərəbistanı, Birləşmiş Ərəb Əmirlikləri, nüfuzlu Qətər və Küveyt var: "Misir də əlindən gələni edir. İndi bir araya gəlməliyik, bir-birimizi qorumaq öhdəliyi götürməli, çiyin-çiyinə çalışaraq bölgədə öz maraqlarımızı, nizam-intizamı bərqərar etməliyik. Avropa, Şimali Amerika və başqa yerlərdə ittifaqlar qurulduğu kimi, bu coğrafiyada da bütün bunları iqtisadi, siyasi və hərbi cəhətdən etmək mümkündür".
Siyasi şərhçi Azər Qasımov "Sherg.az"a açıqlamasında deyib ki, Suriyadakı proseslərin sonrakı mərhələsi Hakan Fidanın vurğuladığı kimi, ərəb ölkələrinin türk dünyası ilə birgə təşkilatlanması olmalıdır. Ekspert vurğulayıb ki, Fidan ərəb dünyasının aparıcı ölkələrinin adını çəkir, eyni zamanda vahid birliyin yaranmasının vacibliyinə vurğu edir:
"Qərb dünyasının müttəfiq olmasının vurğulanması isə xüsusilə əhəmiyyət daşıyır. Qərb müttəfiqliyinin təbii olaraq Şərq dünyasına qarşı yönəldiyini, onun təbii sərvətlərinin talanması anlamına gəldiyini deməyə ehtiyac yoxdur. Odur ki, bu, Fidanın yaranmasını istədiyi türk-ərəb müttəfiqliyinin Qərb ekspansionizminin qarşısını almaq gücündə olduğunu başa salmaq istəyidir. Hərbi cəhətdən Türkiyənin özünə əminliyi ərəb ölkələri üçün yeni imkanlar açır. Fidan hərbi müttəfiqlik deməklə, əslində, bildirmək istəyir ki, Qərbdən silah-sursat asılılığında olan ərəb ölkələri azad ola bilərlər. Türkiyənin onları əvəz etmək potensialı var. Həmin varlı ərəb ölkələri dəstək olarsa, bu sahədə daha da böyük uğurlara imza atmaq mümkündür".
Analitikə görə, belə bir müttəfiqlik ən nəhayətində bütün islam dünyası üçün vacibdir:
"İslam aləminin yenidən öz möhtəşəmliyini qaytarmasının əsas yolu birlikdən keçir. Bu arada İranın adının çəkilməməsi təsadüfi deyil. İran fars rejiminin mahiyyəti bütün islam dünyasına bəllidir. Görünən odur ki, Fidan bununla demək istəyir ki, bu birlikdə İran rejimi ya dağılacağı üçün olmayacaq, ya da Tehran rejiminin bu birlikdə ümumiyyətlə yeri yoxdur".
