Paris-2024 Yay Olimpiya Oyunlarında komanda yoldaşı Şevval İlayda ilə birlikdə Türkiyəyə gümüş medal qazandıran atıcı Yusuf Dikeç yenidən gündəmə gəlib.
Teleqraf.com xəbər verir ki, Fransanın mətbuat orqanı “L Equipe” türkiyəli idmançının reportaj üçün qəzetdən 30 min avro istədiyini iddia edib.
Türkiyə mətbuatına danışan Yusuf Dikeç bu iddianı rədd edib. O, bildirib ki, qəzetlə danışıqları onun vəkili aparıb və söhbətin məğzindən xəbəri olmayıb: “Mənim ağzımdan hər hansı məbləğlə bağlı söz çıxmayıb. Qəzetin vəkillə danışdıqları yox, mənim dediyim söz daha vacibdir”.
Qeyd edək ki, Yusuf Dikeç Olimpiadadakı ikonik duruşu ilə qısa müddətdə bütün dünyada böyük azarkeş kütləsi toplamışdı. O, tapançadan atəş açarkən, bir əlini cibinə salmışdı.
