MOSSAD Suriyada keçirdiyi xüsusi əməliyyat zamanı İsrailin ən məşhur kəşfiyyatçısı olan Eli Koenlə bağlı 2500-ə yaxın məxfi sənəd tapıb.
Modern.az bu barədə “The Jerusalem Post” qəzetinə istinadən xəbər verir.
Müsadirə edilən sənədlər arasında Koenin saxta pasportları, İsraildən aldığı mesajlar və təlimatlar, Suriya kəşfiyyat xidmətlərinin müşahidəsi ilə bağlı hesabatlar, həmçinin kəşfiyyatçının edamdan əvvəl yazdığı vəsiyyətnamənin əsli və səs yazıları var.
Mossad bu sənədlərin, eləcə də Eli Koenin bəzi şəxsi əşyalarının Suriya kəşfiyyat xidmətləri tərəfindən yüksək məxfi bir yerdə saxlandığını bildirib. Onların yerini müəyyən etmək və aradan qaldırmaq üçün əməliyyat hazırlamaq çox vaxt aparıb.
Eli Koen 1961-1965-ci illərdə İsrail kəşfiyyatında çalışaraq Suriya rəhbərliyi, müdafiəsi və silahları haqqında mühüm məlumatlar verib. 1965-ci ildə o, Suriya xüsusi xidmət orqanları tərəfindən ifşa edilib və edam edilib. MOSSAD yalnız 2022-ci ilin dekabrında onun ifşa edilməsi və saxlanma şəraiti ilə bağlı məlumatları açıqlayıb. Koenin cəsədinin yeri hələ Mossad tərəfindən müəyyən edilməyib.
