Qırğızıstan Prezidenti Sadır Japarov 2020-ci ilin oktyabr hadisələri haqqında xatirələr yazacağını və kitabın bestsellerə çevriləcəyini açıqlayıb.
Teleqraf xəbər verir ki, bu barədə Qırğızıstan KİV məlumat yayıb.
“O günlərdə baş verənləri təfərrüatı ilə danışsam, çox vaxt aparacaq. Daha sonra xatirələr yazacağam. “Siyasətdə 10 il” adlı kitabımın davamını çap etdirəcəyəm. 2015-ci ildən bəri baş verən hadisələrdən, o cümlədən həbsxanada olduğum müddətdən bəhs edəcəyəm, siz çoxlu maraqlı və təəccüblü şeylər öyrənəcəksiniz”, - Sadır Japarov bildirib.
2020-ci il oktyabr hadisələri — Qırğızıstanda 2020-ci ilin 4 oktyabrında keçirilmiş parlament seçkilərinin nəticələrinə etiraz olaraq baş vermiş genişmiqyaslı etiraz aksiyaları, iğtişaşlar və siyasi böhran idi. Bu hadisələr nəticəsində ölkədə hakimiyyət dəyişikliyi baş verib. Prezident Soronbay Jenbekov vəziyyəti sabitləşdirmək cəhdlərinə baxmayaraq, oktyabrın 15-də istefa verib. Beləliklə, Sadır Japarov həm baş nazir, həm də müvəqqəti prezident səlahiyyətlərini icra etməyə başlayıb. Nəticədə, 2021-ci ilin yanvarında yeni prezident seçkiləri keçirilib və Sadır Japarov qalib gəlib.
