"İlin əvvəlindən başlayaraq inflyasiyada əhəmiyyətli dərəcədə azalma müşahidə edəcəyik. İqtisadi proqramımız öz bəhrəsini verməyə başlayıb".
Oxu.Az-ın "Haber Global"a istinadən xəbərinə görə, bu sözləri Türkiyə Prezidenti Rəcəb Tayyib Ərdoğan Türk Dövlətləri Təşkilatının (TDT) 12-ci Zirvə toplantısında iştirak üçün getdiyi Azərbaycandan qayıdarkən təyyarədə jurnalistlərin suallarına cavab olaraq deyib.
Rəcəb Tayyib Ərdoğan verdiyi açıqlamalarda inflyasiya ilə mübarizədə qərarlılıq ifadə edib.
"Düzdür, periodik təsirlər səbəbindən sentyabr ayında inflyasiya göstəriciləri gözləntiləri üstələyib. Amma heç kim bu vəziyyəti Türkiyə iqtisadiyyatı ilə bağlı pessimist mənzərəyə çevirməsin. Çünki biz günü xilas edən deyil, gələcəyi inşa edən proqram həyata keçiririk. Proqramımızı qərarlılıqla və uğurla tətbiq etməyə davam edirik. Bundan əlavə, periodik dalğalanmalara deyil, bütün iqtisadi mənzərə üzərinə diqqətimizi yönəltmişik. İnflyasiya ilə mübarizə, şübhəsiz ki, asan deyil. Keçmişdə bu mübarizədə uğur qazanmışıq. Bu gün yenidən uğur əldə edə bilərik. Çünki bu sahədə təcrübəliyik. Bu işi bilirik və bunun öhdəsindən necə gələcəyimizlə bağlı çıxış yolu tapmaq üçün çalışırıq. Narahat olmayın, Türkiyə iqtisadiyyatı güclü təməllər üzərində yüksəlir", - deyə Ərdoğan qeyd edib.
