İsti havalarda tez-tez rastlanan sağlamlıq problemlərindən biri də qida zəhərlənməsidir. Hətta bu zəhərlənmələr kütləvi xarakter daşıyır. Ölümə belə, yol açan bu gizli təhlükəyə qarşı necə qorunmalı, nələrə diqqət etməliyik?
Tibb və fəlsəfə elmləri doktoru, həkim Şəmsiyyə Namazlı "Sherg.az"a açıqlamasında qeyd edib ki, fəsildən asılı olmayaraq qida zəhərlənmələri eyni dəşikliklərlə orqana zərbə vurur: ''Zəhərlənmələr toksikasyonun dərəcəsinə uyğun yüngül, orta, ağır formalara bölünür. Burada ən təhlükəsi botulizm xəstəliyidir. Çünki onun müalicəsi çox çətindir. Belə ki, insanda əzələ ağrılarından tutmuş huşun itməsinə qədər problemlər yaradır. Həmin xəstəlik ev şəraitində hazırlanan və çox sevilən müxtəlif turşular, mürəbbələr və kompotlardan yaranır. Bəzən isə bu məhsulların qəbul edilməsi insanın həyatına son qoya bilər. Botulinumun bakteriyası olan clostridium torpaqda yaşayır. Bu bakteriyalar oradan tərəvəzlərə, meyvələrə, suya düşür. Əgər ev şəraitində hazırlanan turşular, tərəvəz salatları, kompotlar, mürəbbələr və s. üçün hazırlanan meyvə və tərəvəzlər kifayət qədər yaxşı təmizlənib yuyulmur, düzgün sterilizasiya olunmur və uyğun olmayan şəraitdə saxlanılırsa, insan botulizm xəstəliyinə tutula bilər''.
Ş.Namazlı vurğulayıb ki, zəhərlənmədən sonra, düzgün qidalanmaya diqqət etməliyik:
''Məsələn,ilk dəfə tanış olmadığımız qidadan az miqdarda qəbul etməliyik. Həmçinin, meyvələri vaxtından erkən yeməməliyik. Çünki hər bir meyvəni öz vaxtında yemək daha məqsədəuyğundur. Bir gün qalan yeməkləri qəbul etmək olmaz. Ona görə ki, yeni təmizlənən bağırsaqlarda tez dəyişiklik baş verir. Həmçinin, bu zaman mümkün qədər qızartma yeməklərini azaltmaq lazımdır. Bu baxımdan müalicə ilə birgə düzgün qidalanmaya diqqət olunsa, effektiv nəticə almaq olar".
