İstanbulda Türkiyə və Rusiya arasında Yaxın Şərqdəki vəziyyətlə bağlı məsləhətləşmələr başlayıb.
Bu barədə “RİA Novosti” türkiyəli diplomatik mənbəyə istinadla məlumat yayıb.
Mənbə bildirib ki, İstanbulda danışıqlar bağlı qapılar arxasında aparılır.
Məlumata görə, görüşdə Türkiyəni xarici işlər nazirinin müavini Nuh Yılmaz, Rusiya tərəfini isə xarici işlər nazirinin müavini Mixail Boqdanov təmsil edir.
Türk siyasətçi və yazar Aydın Sezer Sherg.az-a bildirib ki, Türkiyə və Rusiya münasibətlərində yenidən hərəkətlənmə var:
“Suriyadakı genişlənmələrlə əlaqəli olaraq Rusiya tərəfi daha çox Qətərlə görüşlər aparır. Qətər əmri Əhməd əş-Şaraa üzərindən Suriya rejiminə mesaj göndərir. Ötən günlərdə Qətər əmri Moskvada səfərdə idi. Dolayısı ilə Rusiya Türkiyənin Suriyadakı rəhbərlik üzərində səlahiyyəti olmadığını bilir. Avropa Birliyi və Amerikanın Əhməd əş-Şaraa üzərindəki təzyiqi Türkiyənin təsirini kölgədə qoyur. Çünki Qərb dünyası Əhməd əş-Şaraaya Rusiyayı Suriyadan çıxarmağı söyləyir. Türkiyə isə sözügedən mövzuda Rusiyaya verdiyi vədləri yerinə yetirmədiyinə görə natamam qalır. Ona görə də Rusiya Suriya məsələsində fərqli ölkələrlə əlaqələr qurur. Türkiyə və Rusiya arasındakı görüşün əsas mövzusunun Suriya olduğunu söyləmək mümkündür. Eyni zamanda Liviya məsələsində də Türkiyə və Rusiya arasında görüşmələr davam edir. Bir neçə gün öncə Türkiyə Xarici İşlər Nazirliyindən bir şəxs də Rusiyada idi. Türkiyə və Rusiya arasında enerji məsələsi də müzakirə mövzularından biridir. Bu məsələ xüsusilə “Akkuyu” AES layihəsi və qazla bağlı mövzulardır. 2025-ci ilin sonunda Mavi Akımdan gələn qaz razılaşması bitəcək. Görüşlərin Yaxın Şərqdə proseslərə təsir edəcəyini düşünmürəm. Rusiya onsuz da Suriya məsələsində Qətər və Birləşmiş Ərəb Əmirlikləriylə yanaşı İsraillə də təmas halındadır”.
