İran Prezidenti Məsud Pezeşkianın Azərbaycana səfəri bu həftə planlaşdırılır.
Bu barədə İran XİN sözçüsü İsmayıl Bəqai bildirib.
“Səfər çərçivəsində İran-Azərbaycan əlaqələrinin genişləndirilməsi fonunda görüşlər nəzərdə tutulub”, - o qeyd edib.
Politoloq Tural İsmayılov "Sherg.az"a bildirib ki, Məsud Pezeşkianın Azərbaycana səfəri çox vacib bir dövrdə gerçəkləşir:
"Nəzərə almaq lazımdır ki, İran-Azərbaycan münasibətlərində son zamanlar qarşılıqlı səfərlərin sayı çoxalıb. Daha əvvəl də bu ölkənin bir sıra yüksək rəsmi şəxsləri Azərbaycana gəlmişdi. Həmçinin İran və Azərbaycan nazirləri müxtəlif səviyyələrdə görüşlər həyata keçiriblər. Eyni zamanda sonuncu olaraq, Novruz və Ramazan bayramında da Məsud Pezeşkianla Cənab Prezident İlham Əliyev arasında telefon danışıqları aparılmışdı. Bu fonda İran Prezidentinin ölkəmizə səfəri baş tutur. Digər tərəfdən Azərbaycan və İran arasında özəlliklə nəqliyyat, infrastruktur, o cümlədən gələcək layihələrin müzakirəsi baxımından Pezeşkianın səfərinin mühüm əhəmiyyəti mövcuddur. Məhz xüsusilə İranda bəzi məmurların və medianın apardığı təbliğata görə iki ölkə arasında müəyyən soyuq münasibətlər yaranmışdı. Lakin hər halda hazırda istiləşmə, qarışılıqlı şəkildə diplomatik əlaqələr qurulduğunu müşahidə edirik. Bu mənada hesab edirəm ki, sözügedən görüşdə bəzi Azərbaycanın narahatlığına səbəb olan məsələlər də qaldırılaraq müzakirə ediləcək".
