Lakin son proseslər hələ ki Rusiya-Gürcüstan əlaqələrinin inkişafını əngəlləyə bilməz
Gürcüstanın ərazi bütövlüyünün məsələsi yaxın zamanda həllini tapması mümkündür
Gürcüstan Xarici İşlər Nazirliyi Rusiyanın Abxaziya bölgəsində yerləşən Suxumi Hava Limanından qanunsuz istifadəsinə dair etiraz bəyanatı yayıb.
Bəyanatda Gürcüstanın işğal altındakı Abxaziya bölgəsi ilə hava nəqliyyatının başladılmasından narahatlıq ifadə olunub.
“Rusiya aviaşirkətinin 2025-ci il mayın 1-də işğal olunmuş Abxaziya bölgəsinə qanunsuz uçuş həyata keçirməsi, eləcə də işğal rejimi ilə bağlanmış Suxumi Hava Limanının Rusiyaya verilməsi və istismarı haqqında qondarma saziş Gürcüstanın suverenliyini, ərazi bütövlüyünü, işğal altındakı ərazilərə dair qanununu, beynəlxalq hüququn əsas norma və prinsiplərini, o cümlədən həm Gürcüstanın, həm də Rusiya Federasiyasının üzv olduğu BMT Nizamnaməsini və Beynəlxalq Mülki Aviasiya Təşkilatının (ICAO) Konvensiyasını kobud şəkildə pozur”, -bəyanatda qeyd edilib.
Bəyanatda mayın 1-dən Abxaziya ilə dəmir yolu əlaqəsinin bərpa olunmasından da narahatlıq ifadə olunub.
“Gürcüstan Xarici İşlər Nazirliyi Rusiya Federasiyasını beynəlxalq öhdəliklərini, o cümlədən Beynəlxalq Mülki Aviasiya Təşkilatı Konvensiyası və Avropa İttifaqının vasitəçiliyi ilə 12 avqust 2008-ci il tarixli atəşkəs sazişi üzrə öhdəliklərini yerinə yetirməyə çağırır”,- qeyd edilib.
Politoloq Əli Zülfüqaroğlu Sherg.az-a bildirib ki, hazırda geosiyasi şərtlər Gürcüstanla Rusiya arasındakı münasibətlərin inkişafını diqtə edir:
"Rəsmi Tbilisi Qərbin uzun illər ərzində Gürcüstanda formalaşdırdığı rıçaqların sıradan çıxarılması prosesini həyata keçirir. Bununla bağlı qanunlar qəbul olundu. Xüsusilə xarici təsirlərin şəffaflığını təmin edən qanunu göstərmək olar. Gürcüstan hesab edir ki, geosiyasi şərtlər bu dövlətin regional müstəvidə əlaqələrin genişləndirilməsinə, müəyyən məsələlərin həllinə aparmalıdır. Ona görə də Tbilisi Moskva ilə əlaqələrini normallaşdırmağı prioritet seçib. Rusiya istəyir ki, ümumiyyətlə Qərbin Gürcüstanda möhkəmləndirilməsi problemi təmin edilsin. Həmçinin Gürcüstanın apardığı siyasət, o cümlədən Rusiya ilə münasibətlərin perspektivləri baxımından Tbilisi və Moskva arasında pərdəarxası danışıqların getdiyini deməyə əsas verir. Odur ki, Rusiya və Gürcüstan əlaqələri yaxın gələcəkdə inkişaf edə bilər. Ən böyük problem Gürcüstanın separatizmə məruz qalmasının Rusiya tərəfindən həyata keçirilməsidir. Əslində rəsmi Tbilisi Qərbyönümlü siyasəti nəticəsində bununla üzləşib. Eyni zamanda Gürcüstanın ərazi bütövlüyünün məsələsi yaxın zamanda həllini tapması mümkündür. İndiki məqamda hökumət prosesin sürətləndirilməsinə çalışır".
Politoloq əlavə edib ki, Rusiyanın atdığı son addımlar Gürcüstanın haqlı olaraq narazılığına gətirib çıxarır:
"Sözügedən bəyanat onu deməyə əsas verir ki, Moskva və Tbilisi arasında münasibətlərin perspektivini Rusiyanın bu tipli addımları təhdid altına salır, zədələyir. Lakin son proseslər hələ ki Rusiya-Gürcüstan əlaqələrinin inkişafını əngəlləyə bilməz. Belə məsələləri mütəmadi şəkildə izləmək olar. Ümumiyyətlə bütövlükdə iki ölkə arasındakı münasibətləri bu cür addımlarla pozulması ehtimalı azdır".
