Gacek o qədər məşhurlaşıb ki, hətta “Google" xəritəsinə düşüb
Polşanın Szczecin şəhərinə gələn turistlər Gacek adlı pişiyi ziyarətdən vaz keçmirlər. Gacek, əslində sahibsiz, küçə pişiyidir. Lakin bir video paylaşımı ilə o qədər məşhurlaşıb ki, hətta "Google" xəritəsinə düşüb. Şəhəri gəzənlər tarixi yerləri ziyarət etməklə yanaşı Gacekə mütləq baş çəkirlər. “Şərq” “Milliyet.com”a istinadən bildirir ki, ağ-qara rəngli, “smoking” pişik hazırda şəhərin 1 nömrəli turistik nöqtəsi hesab edilir. Gacek barədə 4 min rəy yazılıb və o, “Youtube” kanalında izləyici rəyləri əsasında 5 “ulduz”a layiq görülüb.
Hər şey bir turist xanımın “heyranlarına layiq gözəl bir toppuş!” ifadəsini yazıb pişiyin fotosunu paylaşmaqla başlayıb. Onu görən hər kəs heyran olub və beləcə Gacek Polşanın Szczecin şəhəri sakinləırinin, həmçinin şəhərə gələnlərin sevimlisinə çevrilib.
İngiltərədən Polşaya səyahət edən Royu adlı istifadəçi isə “Lancasterdən onu görməyə gəldim. Bir az söhbət etdik, kefi yerindəydi...” sözlərini yazıb. Başqa birisi isə “3 saat yol qət etdiyimə dəydi. Onu gördüm”, qeydini edib. Bir neçə gün öncə Gacek “Google" xəritələrindən silinib. Lakin qısa müddət sonra yenidən görünüb. Heyranları isə ona yenidən “ulduz”lar göndərməyə davam edib. Qeyd edilir ki, oxşar hadisə 2021-ci ildə də baş verib. Polşanın Qdansk şəhərində retriever cinsli köpək “eyvandakı köpək” adıyla "Google" xəritələrdə məşhurlaşmışdı.
Amma sonra fotosu silinmişdi. İndi də "Google" xəritələr pişik Gacekin fotosunun silinmə səbəbini soruşan “Washington Post” müxbirinə cavab verəcəyini bildirib, lakin hələ də cavab yoxdur. Cavab aranmağında, turistlərsə Gaceki ziyarət etməkdədir.
Hətta onu görmədən, sığallamadan şəhəri tərk etmək istəməyənlər başqa tarixi yerlərin ziyarətini ləğv edib pişiyi görməyə tələsirlər. Gacek 7 ildir küçədə yaşayır və hər kəslə “dil tapa bilir”. Gacekin adına instagram hesabı da açılıb, 22 min izləyicisi var.
Onun adına feysbuk səhifəsi də açılıb. Gacekə nəzarət edənlər gələnlərdən “onu yemləməyin, çox kökəlir”, desələr də, hər kəs Gaceki nəyəsə qonaq etmək istəyir.
