Azərbaycan və Ermənistan arasında sülh müqaviləsinin imzalanması istiqamətində mühüm irəliləyiş əldə olunub. Hər iki ölkə sənədin mətninin razılaşdırıldığını bildirir. Azərbaycanın xarici işlər naziri Ceyhun Bayramov ötən gün Ermənistanın sülh müqaviləsi mətnində razılaşdırılmamış iki maddə ilə bağlı Bakının tələblərini qəbul etdiyini açıqlayıb.
Dünəndən başlayaq müxtəlif ölkələrin liderləri Azərbaycanla Ermənistan arasında sülh sazişinin mətninin razılaşdırılması xəbərinə münasibət bildirir, bunu alqışlayan bəyanatlar yayımlayırlar.
Avropa İttifaqı Sülh və Dövlətlərarası Münasibətlərin qurulması haqqında Saziş layihəsi üzrə danışıqların başa çatması ilə bağlı Ermənistan və Azərbaycanın müvafiq bəyanatlarını alqışlayıb.
Fransa Prezidenti Emmanuel Makron da Azərbaycan və Ermənistanın sülh sazişinin mətni üzrə razılığa gəlməsini alqışlayıb. Fransa lideri "X" sosial şəbəkə hesabında paylaşım edib. "Ermənistan və Azərbaycan arasında danışıqların yekunlaşdırılması barədə elanı alqışlayıram. Artıq Ermənistan və Azərbaycan arasında Cənubi Qafqazda davamlı sülhə yol açmalı olan sülh sazişinin imzalanmasına heç nə mane olmur", - o qeyd edib.
Siyasi ekspert Sona Əliyeva isə “Sherg.az”a açıqlamasında deyib ki, Fransa başda olmaqla bir sıra Qərb ölkələrinin Azərbaycana qarşı iki standartlarla əhatə edilmiş mövqeləri artıq bizi təəccübləndirmir:
“Əslində Fransa kimi imperialist ölkələr Güney Qafqazda münaqişələrin bitməsini istəmirlər. Onu yenidən alovlandırmağa çalışırlar. Elə Ermənistanın silahlandırılması da bu məqsədi daşıyır. Düşünürəm ki, Ermənistanla Azərbaycan arasında yekun sülh sazişi gələn ilin yayına qədər imzalanacaq. Çünki Ermənistan mövcud konstitusiyaya dəyişikliklər etməlidir. Bunun üçün işğalçı ölkədə referendum keçirilməlidir. İndiki məqamda bu Fransanın və bir sıra Qərb ölkələrinin maraqlarına uyğun deyil. Onlar münaqişənin natamam həllini istəyir. Buna görə də yarımçıq və "quru" bəyanatlar verirlər”.
