Sabah geomaqnit qasırğası olacaq.
Bu barədə Nəsirəddin Tusi adına Şamaxı Astrofizika Rəsədxanası məlumat yayıb.
Bildirilib ki, 22-24 aprel tarixlərinə G1-G2 səviyyəli geomaqnit qasırğası proqnozlaşdırılır.
Tibb və fəlsəfə elmləri doktoru, tanınmış həkim Şəmsiyyə Namazlı "Sherg.az"a bildirib ki, geomaqnit qasırğası meteohəssas insanlara daha çox mənfi təsir göstərir:
"Meteohəssas insanlar temperaturun dəyişməsinə, elektromaqnit dalğalarına, atmosfer təzyiqinin aşağı-yuxarı olmasına qarşı hər kəsdən əvvəl reaksiya verirlər. Xüsusi ilə bu vaxt xroniki xəstəliyi yəni, qan təzyiqi yüksək,ürək-damar sistemində problemi, şəkəri olanlar çox ehtiyyatlı davranmalıdırlar. Belə insanların vacib işləri yoxdursa, mümkün qədər evdən çıxmamaları məsləhətdir. Həmçinin, yüksək temperatur baş verdikdə həmin qrupa daxil olan şəxslər də özlərini qorumalıdırlar. Bu qrupa aid insanlar, həmin müddətdə məcburi deyilsə, evdə olsunlar. Yox əgər çıxarlarsa, istifadə etdikləri dərmanları özlərində saxlasınlar. Digər tərəfdən baş ağrısı və ya digər simptomlar davam edirsə, bir həkimlə məsləhətləşmək vacibdir. Maqnit qasırğası bütün insanlara eyni şəkildə təsir etmir. Əslində, bu prosses yeni deyil və mütəmadi olaraq davam etməkdədir''.
