Uşaqlara D vitamini vermək onların sağlamlığı üçün önəmlidir.
D vitamini, orqanizmdə kalsium və fosforun udulmasına kömək edir və sümük inkişafını dəstəkləyir.
D vitamini çatışmazlığı çox ciddi problemlərə səbəb ola bilər.
Valideynlər bəzən yeri gəldi gəlmədi uşaqlara D vitamini verirlər.
Valideynlərin uşaqlara yeri gəldi-gəlmədi D vitamini verməsi sağlamlığa hansı fəsadları yarada bilər?
Tibb və fəlsəfə elmləri doktoru, tanınmış həkim Şəmsiyyə Namazlı Sherg.az-a açıqlamasında bildirib ki, D vitamini nəinki uşaqlara, hətta böyüklərə də doza ilə verilməlidir:
“Hər kəsin yaşına, qanda olan vitamin əksikliyinə görə vitamin D-nin dozaları təyin olunur. Təəssüf ki, müraciət edən pasientlərin çoxu deyir ki, özümüz aptekdən alıb içirik. Vitamin D əksikliyi yaddaş zəifliyi, xərcəng hüceyrələri və 12 xəstəliyin yaranmasına səbəb olur. Həmçinin vitamin D çoxluğu böyrək, qaraciyər və ürəkçatışmamazlığı kimi problemlər yaradır. Ona görə də yaşından asılı olmayaraq hər kəs vitamin D-nin qanda faizini bilməlidir. Apteklərdə çoxlu sayda və dozada vitamin D var. Hər yaş dövrünə görə damcı ilə gündəlik və həftəlik dozada içilir. Bizim insanlar bunu bazardan meyvə almış kimi qəbul edirlər. Azərbaycanda təəssüf ki, vitamin D-ni yoxlanış edilmədən aptekdən alaraq qəbul edilir. Hər bir insan kalsium, maqnezium və D vitaminini yoxladaraq müayinə olunmalıdır. Onun miqdarına əsasən dozaları və içilmə müddəti təyin edilməlidir”.
