Aprelin 23-də saat 00:05 radələrində 1989-cu il təvəllüdlü şəxs 40 həftə 3 gün hamiləliklə Masallı Rayon Mərkəzi Xəstəxanasına daxil olub.
Bu barədə APA-nın cənub bürosunun sorğusuna cavab olaraq TƏBİB-dən məlumat verilib.
Məlumata görə, zəruri tibbi müayinələr aparılıb, doğuşun konservativ-gözləyici taktika ilə aparılması qərara alınıb. Saat 03:00 radələrində hamilənin səhhətində qəfləti pisləşmə müşahidə olunub və aparılan zəruri reanimasiya tədbirlərinə baxmayaraq, saat 03:26-da ölüm faktı qeydə alınıb.
Hazırda ölümün ilkin səbəbinin müəyyənləşdirilməsi istiqamətində müvafiq araşdırmalar aparılır.
Cərrah-ginekoloq Fəxranə Hüseynzadə Sherg.az-a bildirib ki, doğuş zamanı ölüm halları nadir də olsa mümkündür:
“Səhiyyə sistemi inkişaf etdikcə ana ölümlərində azalmalar var. Ümumiyyətlə ana ölümlərinin səbəbləri müxtəlifdir. Məsələn, bölgələrdə əsasən keysəriyyə zamanı qanama nəzarəti doğru aparılmadığı halda ölüm halları baş verə bilər. Həmçinin əməliyyat sonrası qanamalar ola bilər ki, bu da normal bir haldır. Digər tərəfdən ana ölümləri kompleksion doğru hesablanmadıqda, personal çatışmazlığı və ya personalların düzgün dərs almaması ilə bağlı da ola bilər. Təbii doğuş zamanı qanama olur və biz buna atania deyirik. Bunu səbəbi uşaqlığın yığılmamasıdır. Bu zaman məcbur çalışırıq ki, uşaqlığa dərmanlar, masaj və ilkin yardımla köməklik edək".
Həkim əlavə edib ki, ölüm halları hamilənin öncədən olan xəstəliklərinə, ürək probleminə, qan laxtalanmasındakı pozğunluqlarla da bağlı ola bilər:
"Əvvəlki keysəriyyədən sonra çapığın yırtılması vaxtından əvvəl doğuş əmələ gətirir və xəstə xəstəxanaya yetişə bilmir. Bu zaman əvvəlki çapığın yeri partladığı üçün ana və dölün ölümü baş verir. Bölgələrdə səhiyyə sistemində, strukturda və işçilərdə çatışmazlıqlar var. Problemi olmayan normal hamilələr belə doqquz ay ərzində 5-6 dəfə ginekoloq müayinəsindən keçməlidirlər. Onu artıq həkim olaraq özümüz hamilələrə deyirik. Çox vaxt problemi olan hamilələrə müayinə üçün gün təyin edirik və onlar vaxtında getmədiyi üçün problemlər yaşanır”.
