Qida qatqıları astma tutmalarını tətikləyir
Yeni aparılan bir araşdırma göstərir ki, geniş istifadə olunan qəlyanaltılarda mövcud olan qida qatqıları immunitet sisteminə mənfi təsir göstərərək astmanı tətikləyir.
Bu qatqılar məhsulların dadını və görünüşünü yaxşılaşdırmaq, eləcə də saxlanma müddətini uzatmaq məqsədilə bir çox ultra işlənmiş qida məhsulunda istifadə olunur. Əvvəlki tədqiqatlar göstərib ki, uşaqlar böyüklərlə müqayisədə daha çox belə qidalar istehlak edir və bu maddələrə qarşı daha həssas olurlar.
“News Medical” nəşri yazır ki, bu qatqıların mənfi təsirləri arasında allergiyalar, diqqət çatışmazlığı və hiperaktivlik pozğunluğu (DEHB) kimi sağlamlıq problemləri də var.
Xüsusilə sodyum benzoat və metilparaben kimi qatqı maddələri birbaşa dəri allergiyaları və astma tutmaları ilə əlaqələndirilir.
Bəzi araşdırmalar süni şirinləşdirilmiş içkiləri çox istehlak edən anaların uşaqlarında astma riskinin daha yüksək olduğunu da göstərir.
“Frontiers” jurnalında yayımlanan yeni tədqiqat isə qatqıların uşaqlarda metabolik və immun sistem mexanizmlərini poza biləcəyinə dair mühüm dəlillər təqdim edir.
Araşdırmada 120 astma xəstəsi uşaq və 120 sağlam uşaq müqayisə olunub. Hər iki qrupdan alınan serum nümunələrində 10 müxtəlif qatqının səviyyəsi ölçülüb.
Nəticələr göstərib ki, astma xəstəsi uşaqların serumlarında xüsusilə dehidroasetik turşu və benzoik turşu səviyyələri sağlam uşaqlara nisbətən əhəmiyyətli dərəcədə yüksək olub.
Tədqiqatın yekununda bildirilib:
“Qida qatqıları T hüceyrələrinin və antigen təqdim edən hüceyrələrin metabolik fəaliyyətini poza bilər, immun sistemindəki tolerantlığı zəiflədərək astmanın ağırlaşmasına səbəb ola bilər.”
