Alimlər Braziliyada yarasalarda “MERS-CoV (Yaxın Şərq Tənəffüs Sindromu Koronavirusu)” ilə oxşar xüsusiyyətlərə malik yeni növ koronavirus aşkar edib.
“Sherg.az” “Milliyet.com.tr”yə əsasən bildirir ki, braziliyalı tədqiqatçılar, Honq-Konq Universitetindən həmkarları ilə əməkdaşlıq edərək, 16 müxtəlif yarasa növündən 423 ağız və rektal tampon nümunəsini araşdırıblar. Araşdırmada Braziliyanın şimal-şərqindəki Fortaleza şəhərindən gətirilən yarasalardan götürülmüş tampon nümunələrində yeni növ koronavirus aşkar edilib. Qeyd olunub ki, yeni aşkar edilən virus insanlar və dəvələrdə olan “MERS-CoV” ştammlarına bənzəyir, lakin onun insanlar üçün riskləri hələ müəyyən edilməyib. Bildirilib ki, yeni koronavirusun gen ardıcıllığı təxminən 72 faiz “MERS-CoV” genomuna, onun ev sahibi hüceyrələrə bağlanmaq üçün istifadə etdiyi zülal isə “MERS-CoV” genomuna 71,74 faiz oxşardır. Yarasaların yeni yaranan viruslar üçün su anbarı olduğu və koronavirusların xalq sağlamlığı üçün yaratdığı riskləri müəyyən etmək üçün onların daim nəzarətdə saxlanılmasının vacibliyi vurğulanıb. Alimlər yeni virusun insanlar üçün yaratdığı riskləri müəyyən etmək üçün Honq-Konqdakı yüksək təhlükəsizlik laboratoriyalarında daha çox təcrübə keçirməyi planlaşdırır. Araşdırma "Journal of Medical Virology" (JMV) jurnalında dərc olunub. "MERS-CoV" ilk dəfə 2012-ci ildə Səudiyyə Ərəbistanında aşkar edilib və o vaxtdan bəri iyirmidən çox ölkədə aşkarlanıb. Dəvələrdən qaynaqlandığı güman edilən yoluxucu respirator xəstəlik növü olan "MERS-CoV" 850-dən çox insanın ölümünə səbəb olub.
