Məktəbəqədər təhsil müəssisələrində çalışan təhsilverənlərin 2025-ci ildən sertifikatlaşacağı gözlənilir.
Nazirlər Kabinetinin təsdiqlədiyi Qaydalara əsasən, dövlət məktəbəqədər təhsil müəssisələrində pedaqoji fəaliyyətlə məşğul olan, ali və orta ixtisas təhsilinə malik təhsilverənlərin peşəkarlıq səviyyəsinin və peşə yararlılığının yoxlanılması məqsədilə sertifikasiya imtahanları keçirləcək.
Qaydalara görə, bağça müəllimləri 5 ildə bir dəfə sertifikatlaşdırmadan keçməlidirlər.
Təhsil eksperti Elşən Qafarov isə "Sherg.az" a açıqlamasında deyib ki, sertikasiya təhsilverənlərin peşə qərarlığı, peşəkarlığını yoxlayan bir prosesdir və məktəbəqədər müəssisələrində buna böyük ehtiyac var:
"Məktəbəqədər təhsil müəssisələrində vəziyyət kifayət qədər ciddi və ağırdır. 2011-ci ildən 2021-ci ilin sonuna qədər keçən 10 il müddətində uşaq bağçalarının yerli icra hakimiyyətlərinin idarəsinə verilməsi təhsilin bu pilləsinin tamamilə çökməsinə gətirib çıxarmışdı.
Təsəvvür edin, bu gün məktəbəqədər təhsil müəssisələrində çalışan 16 mindən çox müəllimin 6 minin ali təhsili yoxdur. Çox güman ki pedaqoji təhsili olmayan bağça müəllimləri növbəti ildən başlayacaq sertifikatlaşdırılmaya buraxılmayacaq. Onların əmək müqavilələrinə xitam verilməli və məktəbəqədər təhsil müəssisələrinə yalnız məktəbəqədər təhsil üzrə ali təhsil alan şəxslər cəlb olunmalıdır. Təhsilin İnkişafı üzrə Dövlət Strategiyasında qeyd olunub ki, ümumi təhsil müəssisələrində təhsilverənlərlə yanaşı, məktəbəqədər təhsil müəssisələrində çalışan təhsilverənlər də sertfikasiya prosesinə cəlb olunacaqlar".
2011-2021-ci illər ərzində ölkədə cəmi 18 məktəbəqədər təhsil müəssisəsinin tikildiyini vurğulayan ekspert deyib ki, bunlar da Heydər Əliyev Fondu tərəfindən tikilib: "Göründüyü kimi yerli icra hakimiyyətləri məktəbəqədər təhsil müəssisələrinin tikintisinə heç bir diqqət ayırmayıb. Əksinə həmin dövr uşaqlara ayrılan payların yeyilib - mənimsənilməsi ilə xarakterizə edilir. Odur ki, məktəbəqədər təhsil müəssisələrinin şəbəkəsinin genişləndirilməsi üçün Dövlət Proqramı qəbul edilməlidir".
