Almaniya Prezidenti Frank-Valter Ştaynmayer və xanımı Elke Büdenbenderin Qafqaza səfəri başlayıb.
Axar.az xəbər verir ki, bu, federasiya prezidentinin hər iki ölkəyə ilk səfəridir.
Martın 30-dan aprelin 2-dək davam edəcək rəsmi proqrama əsasən, Prezidentlə xanımı Azərbaycan və Ermənistanda bir sıra vacib görüşlərdə iştirak edəcəklər.
Almaniya lideri Ermənistanda prezident Vaaqn Xaçaturyan və baş nazir Nikol Paşinyanla görüşüb. O, həmçinin “TUMO” İT tədris mərkəzinə baş çəkib və mədəni qəbulda iştirak edib. Sabah Almaniya Prezidenti Dilicana səfər edəcək. Orada o, erməni biznes qurucuları ilə fikir mübadiləsi aparacaq və şəhərsalma layihəsinə baş çəkəcək. Göyçə gölündə o, erməni kilsəsinə və hidrometeoroloji ölçmə stansiyasına baş çəkəcək.
Federasiya rəhbərinin Azərbaycana səfəri çərçivəsində prezident İlham Əliyevlə görüşəcək. O, UNESCO-nun Ümumdünya İrs Siyahısına daxil edilmiş Bakının tarixi mərkəzinə baş çəkəcək, xristian, müsəlman və yəhudi din xadimləri ilə tolerantlıq və dinlər arasında anlaşma haqqında söhbətlər aparacaq. O, həmçinin Azərbaycanda qadınların vəziyyəti ilə bağlı müzakirələrdə də iştirak edəcək.
