"Qərb Rusiyanın Qafqazdan qovulması üçün bütün imkanlardan istifadə edir"
"Rusiya və Ermənistanın vaxtaşırı təmasları münasibətlərin bərpa edilməsinə xidmət edir".
Bu barədə "Sherg.az"a açıqlamasında Vəhdət Partiyasının sədr müavini, politoloq Vasif Əfəndiyev deyib.
Ekspert bildirib ki, Nikol Paşinyanın hakimiyətə gəlişindən sonra zədələnmiş qarşılıqlı etimadın bərpası Rusiyaya daha çox lazımdır:
"Ermənistanın indiyə qədər Rusiyanın ətəyindən möhkəm tutmasının əsas səbəbi Qarabağı özününkiləşdirmək arzusu idi. Bu xəyallar puç olduqdan sonra Paşinyan daha çox Ermənistanın türk hövzəsində yaşaması üçün yollar aramağa çalışır. Nəyə görə Ermənistanın deyil, məhz Paşinyanın istədiyini yazıram, çünki, İrəvanda radikal türk düşmənçiliyi edən təşkilatlar kifayət qədər çoxdur. Həmin qüvvələrin sayəsində erməni xalqı kütləvi psixoz vəziyyətinə salınaraq idarəolunan aqressiv kütləyə çeviriliblər. Bunun nəticəsində Ermənistan cəmiyyəti ağır xəstəliyə tutulub. Özündən razı, dünyada "ən üstün xalq" yalanlarına inandırılmış hay xalqı əsatir və əfsanələr üzərindən uydurulmuş tarixin əsirinə çeviriliblər".
Politoloq vurğulayıb ki, iki ölkə atrasında münasibətlərin bərpası Rusiyanın yenidən Qafqazda söz sahibi olmaq istəyindən irəli gəlir:
"Ukrayna və Suriyada mümkün qədər daha çox əzilən Rusiya ordusu günü gündən zəifləyir. Rusiya artıq silah gücünə Cənubi Qafqaza sahiblənmək imkanlarını itirib. Avropa və ABŞ Rusiyanın Qafqazdan qovulması üçün bütün imkanlardan istifadə etmək istəyirlər. Azərbaycanın ərazi bütövlüyünü təmin etməsini Qərbin anlayışla qəbul etməsi daha çox Rusiyanın Cənubi Qafqaz ölkələrinə təsir dairəsinin məhdudlaşdırılmasına hesablanıb. Rusiyanın gələcəkdə regionda tərədaş ölkə statusunu qazanmaq üçün isə Zəngəzur dəhlizinin açılmasında maraqlıdır. Bu dəhliz İran və Gürcüstanın ürəyincə olmasa da, Türkiyə və Rusiya kimi fövqəldövlətlər maraqlarına uyğun olması prosesin davam etdirilməsinə əngəl olmayacaq".
