Ölkə çökür, ona görə hər fürsətdə terrora baş vuracaqlar, bundan vaz keçməyəcəklər
Düşmən tərəfindən atılan addımları düzgün analiz etməliyik
“Monax” ləqəbli keçmiş erməni zabiti Artur Ayvazyan daha bir populist bəyanatla çıxış edib. O, Azərbaycana qarşı mübarizədə Ermənistanın yeganə çıxış yolunun terrorçu-diversiya qrupları yaratmaq olduğunu vurğulayıb. Qeyd edib ki, tarixə nəzər salsaq, bunun ermənilərin son ümidi olduğunu görərik: “Biz sonradan PKK ilə də hər hansı bir yolla razılaşa bilərik. Vəziyyət çox ciddidir, hər gün bir addım geri çəkilirik. Zəngəzuru, ümumiyyətlə, yaddan çıxarın, o, əlimizdən getdi. İndi İrəvanda hamı bir-birini ittiham etməklə məşğuldur”.
Ekspertlərə görə, ermənilərdən Azərbaycana qarşı həmişə terror aktı gözləmək olar. Çünki erməni terror təşkilatları tarixin müxtəlif mərhələlərində qanlı cinayətlərə, kütləvi qırğınlara imza atıblar. 1988-ci ildən Azərbaycan ərazisində davamlı terror aktları törədiblər. "20 Yanvar" metrosunu partladıblar. ASALA terror təşkilatı isə xarici ölkələrdə Türkiyə diplomatlarını şəhid edib. Həmçinin, Qarabağda daşnakların, o cümlədən PKK və digər qüvvələrə bağlı terrorçuların olduğuna dair çoxsaylı faktlar aşkarlanıb. Lakin şübhə yox ki, ermənilər terrora əl atacağı təqdirdə, Azərbaycan həm Konstitusiyaya, həm də beynəlxalq hüquqa dayanaraq, Qarabağda antiterror əməliyyatına başlayacaq.
Ayvazyanın iddiası ilə bağlı “Şərq”ə açıqlama verən “Atlas” Araşdırmalar Mərkəzinin eksperti Samir Hümbətov bildirib ki, ermənilərin terrorizmlə bağlı bəyanatları, addımları heç birimizi təəccübləndirmir. Analitikin fikrincə, erməni toplumu terrorla birlikdə xarakterizə olunur:
“Ermənilər tərəfindən yaradılan terror təşkilatlarının tarixi bir əsrdən çoxdur. Daşnaksütyün və Asala terror təşkilatlarının adı hamıya məlumdur. Həmçinin, PKK və sonradan ortaya çıxan “Ateşin çocukları” adlı təşkilatların da missiyasında ermənilərə dəstək mühüm yer tutur. Əsas məqam odur ki, ermənilərin terrorçuluq fəaliyyəti sadəcə Azərbaycana deyil, türk dünyasına qarşı yönəlib. Sirr deyil ki, ermənilərin terror aktlarının arxasında Qərb ölkələrinin, o cümlədən Rusiyanın izləri var. Bir çox çirkin kampaniyalarını məhz ermənilər vasitəsi ilə reallaşdırıblar”.
S.Hümbətov vurğulayıb ki, Ermənistanın terror fəaliyyəti dövlət səviyyəsindədir:
“Ölkəyə rəhbərlik etmiş Robert Koçaryan, Serj Sarkisyan kimi şəxslər azərbaycanlılara qarşı terror aktlarının, qanlı cinayətlərin, kütləvi qırğınların başında dayanıblar. Ayvazyan kimilərin sözündə reallıq odur ki, ermənilər hər fürsətdə terrora baş vuracaqlar və bundan vaz keçməyəcəklər. Ona görə də bu məsələdə səfərbər olmalı, atılan addımları daha düzgün analiz etməyi bacarmalıyıq”.
İsmayıl Qocayev
